Yfirkjörstjórn í Kópavogi hefur afhent Þór Jónssyni, fyrrum upplýsingafulltrúa Kópavogs og íbúa í bænum, meðmælalista allra framboða í liðnum sveitarstjórnarkosningum. Daginn fyrir kosningar, þann 30 maí síðastliðinn, kærði Þór yfirkjörstjórn Kópavogs til úrskurðarnefndar um upplýsingarmál fyrir vanrækslu á að afhenda honum skriflegar yfirlýsingar kjósenda um stuðning við framboðin. Þór hefur nú fallið frá þessari kæru því yfirkjörstjórn hefur samþykkt beiðni hans um aðgang og afrit af meðmælalistum framboðanna.
Næstbesti flokkurinn og Píratar brugðust ókvæða við þegar umboðsmenn Samfylkingar og Sjálfstæðisflokks báðu um að fá þessa lista afhenta. Mótmæli þeirra urðu til þess að umboðsmennirnir drógu óskir sínar til baka um að sjá listana. Þór segir það koma óneitanlega á óvart að það voru fulltrúar uppvöðsluflokka gegn stofnanakerfinu sem lögðust gegn gagnsæi í stjórnsýslunni, en ekki talsmenn gamalgrónu flokkanna:
Píratar máttu ekki heyra á það minnst að þessi opinberu gögn í vörslu stjórnvalda yrðu látin af hendi, þegar farið var fram á það, en að öðru leyti hefur mest borið á þeim við að verja leka á trúnaðargögnum. Næstbesti flokkurinn líkti framangreindu gagnsæi í íslenskri stjórnsýslu við starfsaðferðir Stasí, hvernig sem slík röksemdafærsla fær staðist. Alþingi setti nefnilega upplýsingalög og stjórnsýslulög til að koma böndum á stjórnvöld og tryggja rétt borgaranna í viðskiptum sínum við þau.
Þór fannst einboðið að láta reyna á upplýsingaréttinn – sem bar árangur, þótt seint væri, og deilir nú gögnunum af Facebook síðu sinni.
