Myndlistarmaðurinn er Hulda Rós Guðnadóttir og verkið heitir THE WORLD WILL NOT END IN 2015. Hluti verksins er hljóðvörpun af Nýjaheimssinfóníu Antonin Dvorak. Segja má að hér blandist saman eldri tónsköpun sem fjallar um hugmyndina nýjan heim og svo ádeila á heimsendaspár okkar nútímasamfélags.
Hulda Rós Guðnadóttir er íslensk myndlistar- og kvikmyndagerðarkona sem búsett hefur verið í Berlín undanfarin sex ár. Auk þess að vinna með kvikmyndaformið þá vinnur hún með vídeó, blandaðar innsetningar, skúlptúra og gjörninga í verkum sem fjalla um samfélagið út frá mjög persónulegu sjónarhorni, oft byggt á eigin reynslu. Hún hefur haldið nokkrar einkasýningar m.a. í Þoku gallerí á Listahátíð í Reykjavík vorið 2014; í De-Construkt projects í New York vorið 2013; sem hluti af D-sýningarröðinni í Listasafni Reykjavíkur árið 2011 og í Program í Berlín í byrjun ársins 2010. Hún hefur einnig tekið þátt í fjölmörgum hópsýningum og kvikmyndir hennar hafa verið sýndar á alþjóðlegum kvikmyndahátíðum víða um heim. Árið 2008 þá vann hún Edduna fyrir bestu heimildarmyndina og jafnframt Menningarverðlaun DV fyrir bestu kvikmyndina. Heimasíða hennar er: http://www.huldarosgudnadottir.is
