Kristín Sævarsdóttir, Margrét Tryggvadóttir, Erlendur Geirdal, Steini Þorvaldsson, Bergljót Kristinsdóttir, Hákon Gunnarsson, Hildur María Friðriksdóttir, Þorvar Hafsteinsson og Donata Bukowska.
Á félagsfundi Samfylkingarinnar í Kópavogi nýverið var listi flokksins til bæjarstjórnarkosninga samþykktur einróma. Í níu efstu sætum listans eru:
1. Bergljót Kristinsdóttir, bæjarfulltrúi
2. Hákon Gunnarsson, rekstrarhagfræðingur
3. Erlendur Geirdal, rafmagnstæknifræðingur
4. Donata H. Bukowska, kennari og kennsluráðgjafi
5. Hildur María Friðriksdóttir, náttúruvársérfæðingur
6. Þorvar Hafsteinsson, viðmótshönnuður
7. Kristín Sævarsdóttir, vörustjóri
8. Steini Þorvaldsson, rekstrarfræðingur
9. Margrét Tryggvadóttir, rithöfundur
Bergljót Kristinsdóttir, nýr oddviti Samfylkingarinnar í Kópavogi, segist afar ánægð með listann sem sé skipaður öflugu fólki sem tilbúið er til að vinna af heilindum fyrir íbúa Kópavogs
„Kópavogur er á tímamótum,“ segir Berglind. „Kosningarnar í vor eru gríðarlega mikilvægar og tekist er á um grundvallaratriði um framtíð bæjarins. Samfylkingin kemur mjög sterk til kosningabaráttunnar með skýra sýn á hvernig samfélag við viljum byggja upp eftir nánast þriggja áratuga setu helmingaskiptaflokkanna við stjórnun bæjarins. Gildir það um skipulagsmál þar sem horfið er frá verktakaræði en áherslur verða á samráð og íbúalýðræði. Þá munum við efla samstarf við félaga- og íbúasamtök en það hefur lítið farið fyrir slíku hjá núverandi meirihluta. Þá leggjum við áherslu á mennta- og velferðarmál auk umhverfismála í anda klassískrar jafnaðarstefnu sem er leiðarstefið í okkar baráttu,“ segir Bergljót Kristinsdóttir oddviti Samfylkingarinnar í Kópavogi.
