Lýðheilsa er eins og jarðvegurinn undir fótum okkar og er undirstaða í velgengni okkar og líðan. Á síðasta kjörtímabili var unnin víðtæk lýðheilsustefnumótun í Kópavogi sem er sem rauður þráður þvert í gegnum öll svið bæjarins. Stefnumótuninni fylgdi framkvæmdaáætlun og nú eru fjölmörg verkefni á því sviði að verða að veruleika.
Til að nefna einhver er nú verið að meta næringu matar sem boðið er upp á í skólum, leikskólum, sundlaugum og öðrum stofnunum auk matar fyrir eldri borgara. Mælingin er liður í að tryggja næringarríkan og hollan mat. Snemmtæk íhlutun nemenda með vanlíðan og sjálfstyrking barna er mikilvæg áhersla í lýðsheilsustefnunni. Í upphafi þessi árs var settur saman starfshópur hjá Kópavogsbæ til þess að auka samstarfi milli sviða hjá bænum og bæta snemmtæka íhlutun og forvarnir. Við þurfum að auka þekkingu á þeim þáttum sem hafa áhrif á geðheilsu. Í fjárhagsáætlun er gert ráð fyrir að hækka framlög vegna námskeiða og aðkeyptrar ráðgjafar. Áfram verður aukið við úthlutun sálfræðitíma í grunnskólum og aukið við stöðugildi inn í forvarnarverkefni grunnskólanna. Frá áramótum fá líka sundgestir undir átján ára aldri frían aðgang að sundlaugum bæjarins.
Öruggt umhverfi hvetur til hreyfingar. Í Kópavogi er lögð áhersla á að byggja upp fjölbreytt útivistarsvæði og gott stígakerfi fyrir gangandi og hjólandi. Unnið er að því að aðgreina hjólastíga frá göngustígum til að tryggja öryggi. Æfingatæki, bekkir, fróðleiksskilti og vatnsfontar eru víða við stígakerfið og ýmis fleiri verkefni eru í undirbúningi. Í heilsuhringnum umhverfis Kópavogskirkjugarð er líka komið nýtt þreksvæði, fallegir bekkir og gróður. Þá hefur framkvæmdum við endurnýjun leik- og grunnskólalóða verið haldið áfram ásamt markvissri endurnýjun á opnum leiksvæðum.
Að lokum vil ég fullvissa Kópavogsbúa um að áfram verður íbúðalýðræði tryggt því verkefnið „Okkar Kópavogur“, sem komið var á á síðasta kjörtímabili, hefur fengið aukinn styrk með nýju stöðugildi verkefnastjóra íbúatengsla. Ég óska Kópavogsbúum öllum gleðilegra jóla og farsældar á komandi ári.
