MEKÓ er Menning í Kópavogi

Þann 10. september síðastliðinn fengu allir Kópavogsbúar veglegt tímarit MEKÓ inn um lúgurnar hjá sér. Þetta er annað árið sem Kópavogsbær gefur út menningartímarit og fangar blaðið í ár hið öfluga menningarlíf sem fyrirfinnst víðs vegar í Kópavogi.

MEKÓ er nýtt heiti á menningarmálunum í Kópavogi en MEKÓ stendur fyrir Menningu í Kópavogi. Íris María Stefánsdóttir markaðs- og kynningarstjóri MEKÓ segir þetta nýja og ferska útlit menningarmála í Kópavogi hafa verið í vinnslu í dágóðan tíma og er ný og spennandi heimasíða MEKÓ væntanleg.

Elísabet Indra og Íris María.

„Tilkoma MEKÓ felur ekki bara í sér nafna- og útlitsbreytingar. Við viljum að menningarstarfið nái til allra Kópavogsbúa og má því segja að megin hugmyndafræðin að baki MEKÓ sé að fanga menningarlíf bæjarins í öllum hverfum þess í stað þess að binda það einungis við hinar einstöku menningarstofnanir sem nú þegar standa styrkum stoðum með metnaðarfulla dagskrá allan ársins hring, ” segir Íris María. „Við erum komin vel á veg við gerð nýrrar heimasíðu menningarmálaflokksins, meko.is, þar sem fjallað verður um allt menningarstarf í Kópavogi í máli og myndum. Við munum þar auglýsa sýningar og viðburði menningarhúsanna sem og þeirra sem hafa verið styrktir af lista- og menningarráði Kópavogs. Með þessu viljum við efla menningarlífi Kópavogs enn meir.“

Öflugt viðburðahald framundan

Elísabet Indra Ragnarsdóttir verkefna- og viðburðastjóri MEKÓ hefur leitt hóp öflugra og skapandi starfsmanna í menningarmálum Kópavogs í mótun metnaðarfullrar dagskrár sem allir eiga kost á að njóta á komandi mánuðum.

Menning á miðvikudögum og Fjölskyldustundir á laugardögum hafa fyrir löngu fest sig í sessi í menningarstarfi Kópavogsbæjar og í ár verður engin breyting þar á. „Þessir viðburðir eru í boði lista- og menningarráðs og því ókeypis, og munu fara fram sitt á hvað í Gerðasafni, Salnum, Náttúrufræðistofu og Bókasafni Kópavogs. Við vonumst til að geta boðið upp á þessa viðburði á öðrum stöðum í Kópavogi þegar líður á veturinn,“ segir Elísabet Indra.

Hljóðgöngur og aldagamlar handverkshefðir, áhugaverð erindi um náttúruvísindi og listir, hugvekjandi tónleikar og samræður um sköpunarkraftinn er á meðal þess sem verður á boðstólum í hádeginu á miðvikudögum en listamenn, handverksfólk og vísindamenn í fremstu röð leiða viðburðina.

Fjölskyldustundir á laugardögum eru einnig komnar á fullt skrið. „Margar fjölskyldur hafa vanið komu sína til okkar á laugardögum og okkur finnst svo gaman að geta tekið á móti þeim öllum aftur eftir erfitt Covid-19 tímabil,“ segir Elísabet Indra og vonar að fólk verði ánægt með þær ýmsu nýjungar sem verði á boðstólnum í vetur. „Við munum leggja áherslu á að bjóða upp á fjölbreyttar smiðjur þar sem allir fjölskyldumeðlimirnir geta fengið að njóta sín og verða smiðjurnar haldnar á víxl í Gerðarsafni, Náttúrufræðistofu Kópavogs, Bókasafni Kópavogs og Lindasafni alla laugardaga kl. 13 – 15.“

Foreldramorgnar á fimmtudögum verða einnig á sínum stað en í vetur verða foreldramorgnar alla fimmtudaga kl. 10-11 í Bókasafni Kópavogs og hefur starfsfólk bókasafnsins sett saman frábæra dagskrá fyrir nýbakaða foreldra.

„Í vetur munum við einnig leita í umhverfið og náttúruna í viðburðahaldi þegar það á við,“ segir Elísabet Indra, „enda hefur Kópavogur upp á svo marga áhugaverða staði að bjóða sem listafólk hreinlega þyrstir í að vinna með og skapa í. Með því að fara stundum út fyrir veggi menningarhúsanna og listasafnanna fáum við meiri fjölbreytni; óvæntar tengingar við kunnuglega staði verða til og við upplifum umhverfi okkar á nýjan hátt.“

„Það eru spennandi tímar framundan í menningarlífi Kópavogsbæjar og eru vonir bundnar við að hægt verði að bjóða upp á glæsilega aðventuhátíð, vetrarhátíð og barnamenningarhátíð þar sem enn fleirum verður boðið að taka þátt í sýningarhaldi og sjónarspili,“ segja Elísabet Indra og Íris María að lokum.

Deildu:

Facebook
Twitter
Pinterest
LinkedIn

Fleiri fréttir

Jólatónleikar Samkórs Kópavogs

Samkór Kópavogs syngur inn aðventuna á sínum árlegu jólatónleikum sunnudaginn 3. desember n.k. Tónleikarnir verða í Digraneskirkju og hefjast kl. 17:00. Einsöngvari með kórnum að þessu sinni er tenórsöngvarinn Gunnar

Deloitte flytur úr Turninum á Dalveg 30

Kynning Deloitte hefur flutt úr Turninum við Smáratorg, sem löngum hefur verið kenndur við fyrirtækið, í nýtt skrifstofuhúsnæði á Dalvegi 30.  Nýja húsnæðið er byggt samkvæmt umhverfisvottuðu byggingarstöðlunum BREEAM en

Marteinn Þór Pálmason, tannlæknir.

Tannsetrið tannlæknastofa fagnar eins árs afmæli

Kynning Bókaðu tíma í gegnum símaappið Noona eða á netinu Tannsetrið tannlæknastofa, sem staðsett er við Hlíðasmára 17 í Kópavogi, sinnir öllum almennum tannlækningum og tekur við sjúklingum á öllum aldri. Marteinn Þór