Þann 19. desember voru brautskráðir 92 nemar frá Menntaskólanum í Kópavogi við hátíðlega athöfn í Digraneskirkju. Alls 42 stúdentar, 30 iðnnemar, 11 nemar af skrifstofubraut, 6 úr hótelstjórnunarnámi og 3 úr meistaranámi matvælagreina.
Ný skólanámskrá
Í máli Margrétar Friðriksdóttur, skólameistara, kom fram að verið er að leggja lokahönd á nýja skólanámskrá sem kennsla hefst eftir næsta haust. Skólinn hefur nú meira frelsi í mótun námsbrauta jafnt í bóknámi sem verknámi og námstíminn verður styttur í 3 ár. Fjögur þróunarverkefni eru nú í gangi sem tengjast innleiðingu á nýrri skólanámskrá.
Umhverfisvika í MK
Umhverfisdagar voru haldnir í september þar sem boðið var upp á fjölda atburða, fyrirlestra og kvikmyndasýninga sem tengdust efni vikunnar við miklar vinsældir. Fram kom í máli skólameistara að að hápunktur daganna var að skólinn hefur nú tekið upp fulla flokkun á sorpi sem er stórt verkefni í fjölþættum skóla.
MK er heilsuskóli
MK er þátttakandi í verkefninu „Heilsueflandi framhaldsskóli“ en því verkefni er stýrt af Landlæknisembættinu. Á yfirstandandi skólaári er sjónum beint að geðræktinni til að efla góðan starfsanda og stuðla að jákvæðum skólabrag. Á degi gegn einelti fór fram „góðan daginn“ dagurinn í MK þar sem nemendur og kennarar voru einstaklega vingjarnlegir og heilsuðust venju fremur.
Níu erlend samstarfsverkefni
Fram kom að skólinn tekur nú þátt í níu mismunandi erlendum samstarfsverkefnum m.a. um notkun hugbúnaðar í stærðfræðikennslu, notkun á nýjum samfélagsmiðlum, sjálfbærni, frumkvöðlafræði og um vísindi og orku svo nokkuð sé nefnt. Kennarar og nemendur voru á ferð og flugi á haustönn auk þess sem gestkvæmt var í MK.
Góður námsárangur
Varaforseti bæjarstjórnar, Ólafur Þór Gunnarsson afhenti útskriftarnemum viðurkenningar úr Viðurkenningarsjóði MK sem stofnaður var af bæjarstjórn Kópavogs árið 1993. Þrír nemar hlutu viðurkenningu að þessu sinni: Nýstúdentarnir Friðrik Björn Kjartansson og Ásgeir Ólafsson og nýsveinninn Sigurður Ágústsson.
Rótarýstyrkir
Rótarýklúbbur Kópavogs veitti nýstúdent Friðriki Birni Kjartanssyni verðlaun fyrir góðan árangur í raungreinum og Rótarýklúbburinn Borgir í Kópavogi veitti nýsveini í matreiðslu, Sigurði Ágústssyni, verðlaun fyrir góðan námsárangur í iðnnámi.
