Fyrstu hádegistónleikar ársins verða núna á miðvikudaginn kl. 12:15 í Salnum. Mildir og ljúfir tónar í flutningi Kársnestríósins munu leiða okkur inn í nýja árið. Tríóið skipa þær Guðrún Birgisdóttir á flautu, Elísabet Waage á hörpu og Svava Bernharðsdóttir á víólu. Á efnisskrá tónleikanna er Dans góðu andanna úr óperunni Orfeus og Evridís eftir Christoph Willibald Gluck og Sónata fyrir flautu, víólu og hörpu eftir Claude Debussy.
Tónleikarnir eru hluti af tónleikaröðinni Líttu inn í hádeginu sem hóf göngu sína haustið 2012 í Salnum undir listrænni stjórn Guðrúnar Birgisdóttur. Tónleikarnir hefjast kl. 12:15 og standa yfir í hálftíma. Tónleikagestum er boðið upp á kaffi og te fyrir tónleika.
