Kópavogsbær óskar eftir tillögum að nýjum götunöfnum í Smiðjuhverfi en bærinn og Hagsmunasamtök fyrirtækja í Smiðjuhverfi hafa tekið höndum saman og efna nú til samkeppni um ný götunöfn í Smiðjuhverfi.
Með samkeppninni er verið að koma til móts við óskir fyrirtækja í Smiðjuhverfi um að endurskoða götuheiti í hverfinu til að auðvelda viðskiptavinum að rata um hverfið. Götuheitin Smiðjuvegur og Skemmuvegur halda sér en götur sem ganga þvert á þær fá ný nöfn og verða því ekki lengur kenndar við liti eins og nú er. Leitað er eftir nöfnum á 16 götur.
„Það verður spennandi að fá ný götuheiti í Smiðjuhverfi, gamalgróið hverfi í Kópavogi sem þjónar öllu höfuðborgarsvæðinu. Kópavogur er bær í stöðugri þróun, ný heiti gatna í Smiðjuhverfi eru enn eitt dæmið um það,“ segir Ármann Kr. Ólafsson bæjarstjóri Kópavogsbæjar.
Tillögum um ný nöfn má skila inn frá 20. ágúst til 20. september á netfangið nafnakeppni@kopavogur.is. Frjálst er að senda inn fleiri en eina tillögu. Nöfnin geta vísað til örnefna í nágrenninu eða hvað annað sem þátttakendum dettur í hug. Nafnanefnd mun fara yfir innsendar tillögur og leggja áhugaverðustu tillögurnar fyrir bæjaryfirvöld Kópavogs. Kópavogsbær áskilur sér þann rétt að hafna öllum tillögum.
Nafnanefnd er skipuð Axel Eyjólfssyni formanni Hagsmunasamtaka Smiðjuhverfis, Áshildi Bragadóttur framkvæmdastjóra Markaðsstofu Kópavogs, Birgi H. Sigurðssyni skipulagsstjóra Kópavogs og Sigríði Björgu Tómasdóttur almannatengli Kópavogsbæjar.
Hér að neðan má sjá kort af Smiðjuhverfi sem sýnir hvaða götur á að nefna:
