Kæra ungmenni
Býrð þú í foreldrahúsum, ert kannski í námi eða jafnvel búinn í námi og vilt fara að heiman?
Við hjá Vinstri grænum og félagshyggjufólki í Kópavogi vitum að þetta er staðan sem mörg ungmenni í Kópavogi hafa staðið frami fyrir undanfarin ár, en ekki getað breytt, einfaldlega vegna þess hve leiguverð hefur verið hátt og lítið framboð er af litlum íbúðum sem henta einstaklingum. Námsfólk í Kópavogi, sem vill leigja námsmannaíbúðir hefur ekki átt þess kost að fá slíkar íbúðir í Kópavogi, því þær eru einfaldlega ekki til. Unga fólkið okkar hefur því gjarnan flutt til nágrannasveitarfélaganna. Við hjá VGF viljum að allir hafi val um búsetu og að ungir Kópavogsbúar geti, ef þeir vilja, áfram búið í bænum sínum þó að þeir flytji úr foreldrahúsum.
Vinstri græn og félagshyggjufólk í Kópavogi vilja að Hamraborgarsvæðið og svæðið þar fyrir norðan verði sérstaklega skipulagt með þarfir þeirra í huga sem vilja litlar íbúðir, vera miðsvæðis, hafa þjónustu í göngufæri og nýta sér almenningssamgöngur. Þar má nefna uppbyggingu námsmannaíbúða, sem munu verða tengdar háskólasvæðinu með greiðum almenningssamgöngum og hjólreiðastígum. Við uppbyggingu á þess háttar byggð á þessu svæði teljum við jafnframt að Hamraborgarsvæðið muni blómast og lifna við.
-Margrét Júlía Rafnsdóttir skipar 2. Sæti á lista Vinstrí grænna og félagshyggjufólks í Kópavogi.
