Góður gangur er á framkvæmdum við Norðurturn Smáralindar sem lengi hefur staðið hálfkláraður. Glitnir, Íslandsbanki, Tryggingamiðstöðin, BYGG, Lífeyrissjóður verkfræðinga og tvö önnur félög stofnuðu nýlega félagið Nýr Norðurturn hf um verkefnið og blása nú til framkvæmda á ný. Ráðgert er að Norðurturninn verði fjórtán hæðir.
„Það er allt að komast úr startholunum hjá okkur núna, við erum að virkja vinnusvæðið, reisa krana og vinna áfram í fjármögnun. Gengið hefur verið frá leigusamning við Reginn fasteignafélag um leigu á tveimur fyrstu hæðum hússins og hefur Reginn gengið frá leigusamning við Baðhúsið um að flytja á aðra hæð hússins í lok ársins þannig að það fer að færast líf í Norðurturninn,“ segir Ríkharð Ottó Ríkharðsson, framkvæmdastjóri Nýs Norðurturns hf.
-Hvenær er búist við að turninn verði tilbúinn?
„Við reiknum með að framkvæmdir klárist á næstu 18 – 24 mánuðum. Það er stefnt að því en svo getur margt gerst á leiðinni.“
-Það gengur sú kjaftasaga um bæinn að bæjarskrifstornar í Fannborg muni flytjast í Norðurturninn, er það rétt?
„Það væri mjög ánægjulegt ef þessi kjaftasaga væri sönn, en ég hef bara ekki heyrt hana áður,“ segir Ríkharð og hlær. „Það eru örugglega margar hugmyndir og margt rætt en ég veit þó ekki til að þetta sé á dagskrá – þó þetta væri að sjálfsögðu langskynsamlegast fyrir bæinn,“ segir Ríkharð Ottó Ríkharðsson, framkvæmdastjóri Nýs Norðurturns hf.
