Það kvað við nýjan tón í Salnum laugardaginn 19. janúar þegar danskir, sænskir og íslenskir rapp og hipp hopp tónlistarmenn stigu á svið á þrennum tónleikum við mikinn fögnuð tónleikagesta.
Iris Gold frá Danmörku var fyrst norrænu gestanna á svið en hún er rísandi stjarna í tónlistarheiminum. Tónlist hennar er blanda af klassísku hipp hoppi, poppi og soul tónlist. Heillaði hún tónleikagesti Salarins upp úr sætunum og er vert að fylgjast með henni á komandi árum.
Lilla Namo frá Svíþjóð kom sem stormsveipur inn í sænskt tónlistarlíf árið 2012 og hefur verið tilnefnd til Årets Svenska Rap og Musikguiden í P3 Gull auk þess að vera tilnefnd til Grammy verðulaunanna sem textahöfundur. Er óhætt að segja að kraftmikil framkoma hennar og einstök tónlist hafi verið vel tekið af tónleikagestum kvöldsins.
Raske Penge einn fremsti og þekktasti tónlistarmaður á sviði dancehall og reggí tónlistar í Danmörku lauk kvöldinu með skemmtilegri framkomu og þéttu undirspili hjómsveitar sinnar.
Kópboyz – okkar menn
Auk norrænu gestanna tróðu íslenskir tónlistarmenn upp en hafa þeir allir beina eða óbeina tengingu við Kópavog enda má segja að Rappið eigi íslenskar rætur sínar í bænum. Frumkvöðull rappsins á Íslandi Erpur Eyvindarson eða Blaz Roca steig fyrstur á svið og lagði tóninn fyrir kvöldið með magnaðri framkomu.
Ragna Kjartansdóttir betur þekkt sem Cell7 stal senunni með nýjum og eldri lögum. Framkoma Hugins fangaði huga viðstaddra en óhætt er að segja að Herra Hnetusmjör hafi stolið hjörtum ungra áheyrenda sem enduðu uppi á sviði með honum og tóku lagið.
Salurinn er styrkhafi PULS verkefnis Norræna menningarsjóðsins til tveggja ára. Markmið PULS er að gera tónleikahöldurum kleift að bjóða upp á dagskrá með norrænum tónlistarmönnum og kynna tónlist þeirra milli Norðurlandanna. Hátíðin var hluti af Dögum ljóðsins sem lauk þegar ljóðstafur Jóns úr Vör var afhentur í Salnum við hátíðlega athöfn mánudaginn 21. janúar sl.
