Nýr þjónustusamningur var nýverið undirritaður á milli Fjölsmiðjunnar annars vegar og Reykjavíkurborgar, Mosfellsbæjar, Seltjarnarness, Kópavogs, Garðabæjar og Hafnarfjarðar hins vegar.
Í samningnum er skilgreint samstarf sveitarfélaganna og Fjölsmiðjunnar um verkþjálfun ungs fólks á aldrinum 16 – 24 ára sem hætt hefur námi og/eða ekki náð fótfestu á vinnumarkaði. Samningur þessi kemur í stað eldri samnings, en samstarf sveitarfélaganna og Fjölsmiðjunnar hefur staðið í liðlega áratug.
Fjölsmiðjan tekur við nemendum samkvæmt tilvísun sveitarfélaganna og veitir þeim verklega fræðslu og aðstoð til að búa í haginn fyrir þá til aukins skólanáms eða þátttöku á vinnumarkaði, meðal annars með því að greina styrkleika og áhugasvið hvers og eins. Sveitarfélögin greiða laun nemanna meðan á þjálfun stendur og að auki greiða sveitarfélögin rúmar níu milljón krónur í rekstrarstyrk til Fjölsmiðjunnar á árinu 2014.
Samningur þessi er til eins árs, og á samningstímanum verður einnig unnið að því að leita leiða til að styrkja rekstur Fjölsmiðjunnar til lengri tíma, meðal annars með því að tengja starfið betur við skólakerfið og með breikkun á núverandi aðstandendahópi. Auk þess rekstrarframlags sem sveitarfélögin leggja Fjölsmiðjunni til samkvæmt þessum samningi, þá greiða þau einnig 40% af húsaleigu Fjölsmiðjunnar á móti 60% framlagi ríkissjóðs, segir í tilkynningu frá Samtökum sveitarfélaga á höfuðborgarsvæðinu.
