Markaðsstofa Kópavogs opnar á næstu dögum nýsköpunarsetur í Kópavogi í samstarfi við Kópavogsbæ og atvinnulífið í bænum, með það að markmiði að skapa ný störf. Nafnið SKÓP, sem er þátíð af sagnorðinu skapa, var valið í nafnasamkeppni meðal Kópavogsbúa og stendur það fyrir Nýsköpun í Kópavogi.
Að sögn Björns Jónssonar hjá Markaðsstofu Kópavogs verður í boði skapandi og hvetjandi umhverfi fyrir frumkvöðla sem eru í leit að þekkingu og lausnum. Samfélag, fræðsla og handleiðsla veitir skjól til útungunar góðra hugmynda og öflugt tengslanet kemur þeim í framkvæmd. Sérstaklega verður horft til þess að styðja einstaklinga sem eru í atvinnuleit og hjálpa þeim að koma sínum viðskiptahugmyndum í framkvæmd og skapa sér þannig sín eigin atvinnutækifæri.
Áhersla verður lögð á stuðning við frumkvöðla á fyrstu skrefum nýsköpunar og þeim m.a. leiðbeint í gegnum skipulagt ferli við að ramma inn hugmynd og breyta henni í verðmæta vöru. Afurð vinnu hvers þátttakanda verður viðskiptaáætlun sem innheldur m.a. lýsingu á viðskiptahugmynd, markaðsgreiningu, framtíðarsýn og aðgerðaráætlun studd af raunhæfri rekstrar- og fjárfestingaáætlun. Á staðnum fá þátttakendur aðgang að skapandi umhverfi og öflugu tengslaneti; aðgang að tölvuveri gegn vægu gjaldi; faglega leiðsögn og stuðning frá sérfræðingum; fræðslu og upplýsingagjöf um þætti sem skipta máli í frumkvöðlaumhverfinu ásamt leiðsögn við að sækja fjármögnun og nýsköpunarstyrki.
Heimsmarkmið Sameinuðu þjóðanna um sjálfbæra þróun verða höfð að leiðarljósi í starfsemi SKÓP. Verkefnið er einnig hugsað til að stuðla að bættri lýðheilsu með því að bjóða spennandi og uppbyggjandi umhverfi sem breytir óvissu og kvíða í bjartsýni og tilhlökkun. Helstu bakhjarla verkefnisins eru Kópavogsbær, Íslandsbanki og NTV skólinn.
Guðmundur Sigurbergsson viðskiptafræðingur hefur verið ráðinn umsjónarmaður setursins og ráðgjafi en hann hefur mikla reynslu í ráðgjafastörfum m.a. við nýsköpun og stofnun rekstrar. Áhugasamir eru hvattir til að kynna sé starfsemi SKÓP á vefsvæðinu www.skop.is eða með því að hafa samband á netfangið gudmundur@skop.is.
