Nú er mikið rætt um þessa PISA könnun og slæmar niðurstöður íslenskra ungmenna í henni. Hérna er hægt að skoða hvernig þessi könnun virkar: http://www.oecd.org/pisa/test/
Þeir sem hafa tekið greindarvísitölupróf („IQ test“)ættu að kannast við útfærsluna. Hér er fyrst og fremst verið að kanna línulega hugsun og getu til að lesa úr gögnum og greina mynstur. Hvort sem er í formi texta eða tölulegra gagna. Sem sagt heilastarfsemi sem gjarnan er kennd við “left-brain” eða “Thinking Characteristics” á Myers-Briggs persónuleikaskalanum.Greinileg mismunun
Með því að leggja bara áherslu á þessa tegund hugsunar á sér stað greinileg mismunun sem býr til umhverfi þar sem hópur ungmenna mun upplifa sig heimskari en önnur og þar af leiðandi á einhvern hátt lélegri manneskjur en hinir. Undanfarin ár hafa íslenskir kennarar unnið frábært starf í því að koma til móts við fjölbreytilega eiginleika barna, til dæmis þeirra sem hafa ríka tilfinningagreind og skapandi hugsun en eru ekki endilega sterk í rökfræðilegum greiningum. Þetta finnst mér mjög jákvætt enda snertir þetta mál mig beint gegnum börnin mín.
Jákvæð þróun
Því miður hefur lítið verið fjallað um þá jákvæðu þróun að að samkvæmt niðurstöðum PISA rannsóknarinnar fer sjálfstraust gagnvart námsefni vaxandi og námskvíði minnkandi. Það er þó skiljanlega lítið áhugaverð þróun í augum þeirra sem miða árangur við tölfræðilegar greiningar á greind og staðalfrávik greindarvísitölumælinga á milli ára.
Til hamingju íslensk ungmenni. Framtíð okkar er björt í ykkar höndum.
Jónas Sigurðsson, tónlistarmaður.
