Rannveig Tryggvadóttir í Anarkíu

Auðun Georg Ólafsson

21/07/2015

Litirnir vega salt er titill myndlistarsýningar Rannveigar Tryggvadóttur sem opnar í Anarkíu listasal í Kópavogi laugardaginn 25. júlí. Nær öll verkin á sýningunni eru unnin á þessu ári, flest með olíu á striga. „Allar mínar myndir eru borgar- eða landslagsmyndir, ómeðvituð túlkun útfrá litum, formum og mynstri sem ég sé allstaðar; ljós og skuggamyndir, hvernig skuggar falla og birtan endurvarpast, hvernig ljósið fellur í stafi,“ segir Rannveig.

Rannveig Tryggvadóttir stundaði nám við Högskolan för design och konsthantverk í Gautaborg og úrskrifaðist með MFA-próf ári 1988. Hún hefur látið til sín taka í leirlist, rak eigin keramikvinnustofu 1990-2013 og hefur sýnt keramik á þremur einkasýningum og tekið þátt í fjölda samsýninga. Á síðustu árum hefur Rannveig snúið sér meira að málverki, hún lagði stund á málun í Myndlistarskóla Kópavogs 2003-2005 og hefur auk þess sótt fjölda námskeiða, bæði hérlendis og í Danmörku og á Ítalíu, m.a. masterclass-námskeið hjá Bjarna Sigurbjörnssyni og Serhiy Savchenko. Þetta er þriðja málverkasýning hennar en hún hefur einnig sýnt verk sín á nokkrum samsýningum.

Opnunin verður eins og fyrr segir laugardaginn 25. júlí kl. 15-18 en sýningn stendur til 16. ágúst.
Anarkía listasalur er til húsa að Hamraborg 3 í Kópavogi (aðkoma að norðanverðu, frá Skeljabrekku).
Anarkía er opin kl. 15-18, alla daga nema mánudaga.