Reyni Carl Þorleifsson, eða „Reyni bakara,“ þarf varla að kynna en hann hefur rekið tvö bakarí í bænum; annað á Dalvegi og hitt í Hamraborg, í fjöldamörg ár. „Ég hóf þennan rekstur árið 1994 með fjölskyldu minni og opnaði við Dalveg því mér leist svo vel á skipulagið hér. Dalvegurinn var teiknaður upp sem lífæð Kópavogs og hér var gott að vera. Mér telst svo til að við séum elsta fyrirtækið sem er enn í rekstri við Kópavogsdalinn,“ segir Reynir kankvís. Á þessum tíma voru ekkert nema kál- og kartöflugarðar í nánasta nágrenni við Reyni bakara en fljótlega fór að sjást í húsgrunna og iðnaðarmenn á svæðinu í kring. Þeir urðu fastir gestir hjá Reyni og mæta reyndar margir hverjir enn á morgnana í kaffi og kleinu. Það gerir líka hópur eyjamanna en Reynir á sjálfur ættir að rekja til Vestmannaeyja. Fyrir nokkru síðan fékk Matís Reyni til að baka brauð úr byggi og repjuolíu sem slegið hefur í gegn og þá er súrdeigsbrauðið, sem er án gers og sykurs, gríðarlega vinsælt. „Þessi rekstur hefur vaxið og dafnað. Nú starfa 40 manns hjá fyrirtækinu. Þetta er orðið býsna stór vinnustaður,“ segir Reynir en verður síðan alvarlegur í bragði.
Salan dregist saman þegar beygju á innkeyrslu var lokað
„Umsvifin hafa aukist, jafnt og þétt, þar til fyrir rúmu ári að bærinn lét loka fyrir innkeyrslu á bílaplanið til okkar fyrir umferð vestur Dalveg.
Fyrir breytinguna á gatnamótunum í fyrra var hægt að beygja frá vinstri, yfir Dalveg, inn á bílaplanið til Reynis bakara. Mynd: ja.is
Lok og læs. Eftir að hliði var komið upp sem varnar innkeyrslu þarf að keyra vestur Dalveg og inn á hringtorg og beygja síðan snögglega inn á bílaplanið til Reynis. Hann segir þessa einföldu breytingu hafa valdið sér miklu tjóni.
Til þess að komast til okkar, ef þú keyrir vestur Dalveg, þarftu að keyra fram hjá Sorpu; fara inn á hringtorg sem kemur þar á eftir og skipta síðan snöggt um akgrein til að beygja inn á bílaplanið til okkar. Fáir ökumenn vilja leggja þetta á sig og þetta getur skapað stórkostlega hættu og árekstra sem við höfum orðið vitni að,“ segir Reynir og bætir við að bílaplanið hjá honum sé að breytast í umferðargötu. Ökumenn skjótist þar frekar inn til að stytta sér leið í gegnum Dalveg. Slíkt skapar slysahættu. „Það virðist sem verið sé að bíða eftir að hér verði stórslys áður en nokkuð verði að gert. Hver á að bera ábyrgð á því? Ég skil ekki af hverju verið er að búa til vandamál og slysagildru. Þetta gekk ágætlega eins og þetta var, þegar innkeyrslan var opin. Þetta eru einu gatnamótin við Dalveg þar sem er lokað fyrir að beygja. Í fyrra, um leið og þetta var gert, fóru umsvifin hjá mér að minnka. Mér reiknast svo til að á fyrstu tíu mánuðum síðasta árs hafi salan dregist saman um 14 milljónir. Það munar um minna. Það hefur oft hvarflað að mér að loka þessu bara og hætta.“
Karl Eðvaldsson, deildarstjóri gatnadeildar Kópavogsbæjar, segir það hvorki vera á skipulagi né á áætlun að opna innkeyrsluna. „Dalvegurinn var lokaður fyrir vinstri beygjum út frá umferðaröryggi og umferðarflæði. Það er álitið hættulegt að taka vinstri beygjur inn eða út af svona umferðarmiklum götum, sérstaklega þar sem það eru tvær akreinar í sömu átt. Út frá þessum forsendum þá var lokað fyrir vinstri beygjum inn og út af Dalveg. Þar af leiðandi stendur ekki til að breyta út frá fyrri framkvæmdum,“ segir Karl.
Reynir bakari segir embættismenn bæjarins ekki gera sér grein fyrir alvarleika málsins. „Ég hef safnað nokkur hundruð undirskriftum og talað við alla sem mér hefur dottið í hug hjá bænum. Það sýna allir skilning. En, það gerist ekki neitt. Sinnuleysið er hvimleitt og fer ákaflega í taugarnar á mér. Það sem ég vil sjá í Kópavogi í næstu kosningum er að það verði þá ekki eingöngu kosið í bæjarstjórn heldur verði embættismenn bæjarins einnig kosnir í beinni kosningu. Margir hafa setið í yfir 20 ár. Það þarf að yngja upp til þess að opna fyrir ferskari hugmyndir. Með því að kjósa beint í öll embætti yrðu menn ábyrgari gerða sinna.“
Facebook
Instagram
YouTube
RSS