Á undanförnum tveimur árum hefur sorphirðugjald í Kópavogi hækkað um 50% og er það eingöngu vegna aukins sorpmagns. Aukinni velmegun fylgir aukið sorp. Við einfaldlega kaupum meira og hendum meira.
Ísland hefur skuldbundið sig á alþjóðavísu til að minnka það sorp sem fer til urðunar og það er ekki síst gert með aukinni flokkun sorps. Kópavogsbúum er nú gert auðvelt að flokka sorp meðal annars með því að nú má setja pappír og allt plast í bláu tunnu heimilisins.
Mikilvægt er að allir taki höndum saman, einstaklingar, fyrirtæki, félagasamtök, svo og stofnanir bæjarins og flokki sorp. Þeir sem nú þegar hafa hafið þessa vegferð eiga hrós skilið.
Þó að afar mikilvægt sé að við flokkum sorp sem allra mest er þó mikilvægast að minnka það sorp sem til verður. Það gerum við meðal annars með ábyrgum innkaupum og minni sóun, með því að nota sem minnst einnota og sem mest fjölnota. Þannig stuðlum við jafnframt að minnkuðu kolefnisspori og spornum við loftslagsbreytingum.
Nú þegar hátíð ljóss og friðar nálgast leitar hugurinn oft til þeirra sem minna mega sín, fátækra og sjúkra. Hugsum til barnanna okkar sem munu erfa landið og hugsum til fólksins í þeim heimshlutum sem verst verða úti vegna loftslagsbreytinga. Hugsum einnig til jarðarinnar sem má sér oft lítils vegna athafna okkar. Veltum fyrir okkur hvernig við getum með daglegum athöfum stuðlað að betri framtíð, betra umhverfi og heilbrigðari jörð. Með því að minnka sorp og sóun leggjum við lóð á þær vogaskálar.
Megi jólahátíðin færa ykkur gleði og frið.
