Safna fæðingarsögum feðra og ætla að gefa út í bók

Í Smárahverfinu býr parið Ísak og Gréta María en þau eru að vinna að verkefni sem heitir „Fæðingarsögur feðra“. Markmiðið er að gefa sögurnar út í bók. Þau hófu söfnunina í nóvember í fyrra, nánar tiltekið á feðradaginn, og eru því að fagna eins árs afmæli verkefnisins um þessar mundir. Tilgangurinn er tvíþættur. Annars vegar vilja þau fá feður til þess að ræða um upplifanir sínar og reynslu af fæðingum barna sinna. Hins vegar óska þau eftir að fá feður til að skrifa niður sínar sögur og senda til birtingar í bók sem þau hyggjast gefa út á næsta ári. Þannig vilja þau varðveita sögurnar og gefa fleirum tækifæri á að lesa þær. Sögurnar verða nafnlausar í bókinni en með hverri sögu verður birt fæðingarár föður og barns, auk fæðingarstaðar.

Sjaldan rætt um fæðingu

Með verkefninu vilja þau Gréta og Ísak fá feður til að lýsa sinni upplifun af fæðingum barna sinna. Þau segjast hafa fundið strax í upphafi að margir foreldrar í kringum þau hafi ekki rætt fæðingu barna sinna sín á milli. „Það er algengast hjá vinum okkar sem eiga börn að báðir aðilar hafi verið viðstaddir fæðinguna. Það kann að vera ástæðan fyrir því að það er sjaldan sem fólk hefur rætt um fæðinguna og hvernig báðir aðilar upplifa ferlið. Það má með sanni segja að það að eignast barn sé eitt af því stærsta sem við sem manneskjur getum upplifað og því finnst okkur mikilvægt að við ræðum þetta og þá sérstaklega við þann sem er með okkur í ferlinu. Það á bæði við um góðu stundirnar, þar sem allt gengur vel upp, og einnig þær sem fara ekki eins og kannski vonast var eftir,“ segir Ísak.

Frábær viðbrögð

Gréta og Ísak halda utan um verkefnið á facebook síðu sinni: „Fæðingarsögur feðra.“ Þar er hægt að senda inn reynslusögur og einnig á netfangið: faedingarsogurfedra@gmail.com. Að auki halda þau úti síðu á Instagram undir sama nafni. Á þessum síðum er hægt að finna nánari upplýsingar um verkefnið og hafa samband við þau. Þau hvetja að sjálfsögðu alla til að fylgja þeim á samfélagsmiðlum. Á facebook síðunni má t.d. lesa þrjár áhugaverðar fæðingarsögur frá feðru.

„Viðbrögðin sem við höfum fengið við verkefninu eru hreint út sagt frábær. Við fengum sendar til okkar sögur strax á fyrsta sólarhringnum,“ segir Ísak. „Við viljum fá sem flestar sögur í verkefnið hvort sem þær eru stuttar, langar, skemmtilegar, fyndnar, erfiðar og allt þar á milli. Við viljum heyra af hefðbundnum fæðingum, heimafæðingum, keisaraskurðum, fæðingum í bílum, nýjum sögum, eldri sögum og sögur úr sveitum þessa lands, svona eins og þær voru hér áður fyrr. Það er pláss fyrir allar sögur í verkefninu,“ bætir hann við.

Hvað varðar útgáfudag bókarinnar svarar Ísak því til að það fari allt eftir því hvernig söfnunin gangi. „Okkur þykir ofboðslega vænt um þetta verkefni og sögurnar sem við okkur er treyst fyrir. Við ætlum að vanda okkur eins og við getum og munum gefa bókina út þegar við erum ánægð með innihald hennar. Við viljum að bókin verði eiguleg og falleg að innan sem utan.“

Markmiðið er að bókin nýtist öllum þeim sem hafa áhuga á fæðingum, hvort sem það eru verðandi foreldrar eða þeir sem eiga börn fyrir. Ísak tekur það fram að þau hafi fengið fallegar kveðjur frá feðrum sem hafa notað þetta sem tækifæri til að ræða erfiðar tilfinningar eftir fæðingu og þyki þeim mjög vænt um þau skilaboð.

Þau Gréta og Ísak hvetja alla til að setjast niður og ræða um fæðingar barna sinna. Þau vona að fleiri feður skrifi niður sína fæðingarsögu og sendi þeim í verkefnið. „Það getur verið bæði áhugavert og gaman að skrifa niður sína sögu og varðveita,“ segir Ísak. „Sumir hlutir eiga það til að gleymast í ys og og þys hversdagsins. Það er saga að segja frá því þegar maður kom í heiminn. Þekkja allir sína sögu?“