Kópavogsbúar eru hvattir til að leggja einkabílnum og draga frekar fram göngustkóna og strætókortið í Samgönguviku sem hefst í næstu viku. Samgönguvikan, sem rúmlega eitt þúsund borgir og bæir í Evrópu taka sameiginlega þátt í, er haldin til að vekja fólk til umhugsunar um umhverfi sitt og hvernig mismunandi samgöngumátar hafa áhrif á bæði umhverfi og heilsu.
Í ár er yfirskrift Samgönguvikunnar „Tært loft – þú átt leik“ og athyglinni því beint að áhrifum samgangna á loftgæði í þéttbýli. Staðreyndirnar eru augljósar – hreinar borgir eru heilbrigðar borgir. Loftgæði hafa ekki aðeins áhrif á heilsu fólks – loftmengun skaðar einnig umhverfið, hefur m.a. áhrif á ósonlagið og loftslagsbreytingar.
Sveitarfélög á höfuðborgarsvæðinu og víðar hafa undirbúið dagskrá fyrir samgönguvikuna. Í Kópavogi verða kynntar niðurstöður á talningu umferðar á göngu- og hjólastígum í bænum sem unnin var í sumar. Eins og undanfarin ár mun umhverfis- og menntasvið standa fyrir könnun á ferðavenjum sex og tíu ára barna, til skóla, í Kópavogi. Einnig verður ganga um trjásafnið í Meltungu, austast í Fossvogsdal í tilefni Dags íslenskrar náttúru. Ýmsir aðrir viðburðir verða á höfuðborgarsvæðinu, t.d. verður ráðstefna með yfirskriftina „Réttur barna til hjólreiða“ í Iðnó og hjólatúr í Heiðmörk tengdur Degi íslenskrar náttúru. „Hjólum í skólann“ átakið hefst en það er heilsuátak ÍSÍ í framhaldsskólum.
Margt hefur áunnist í vistvænum samgöngum undanfarin ár í bænum, má þá helst nefna hjólreiðaáætlun Kópavogsbæjar, göngu- og hjólreiðastígur meðfram Hafnarfjarðarvegi og Reykjanesbraut yfir í Mjóddina sem fer senn að vera tilbúinn. Þessa dagana stendur jafnframt yfir vinna við hjólreiðastíg við Ásbraut. Áætlanir gera ráð fyrir að framkvæmdum við stíginn verði lokið fyrir veturinn.
Hægt er að fylgjast með fréttum og viðburðum Samgönguviku á: www.facebook.com/samgonguvika
Bæjarbúar eru hvattir til að kynna sér göngu- og hjólastíga bæjarins og nýta þá í ferðum sínum. Kort af stígunum má finna á heimasíðu bæjarins, www.kopavogur.is Jafnframt er bent á Strætó bs. en að ferðast með Strætó er einföld og ódýr leið fyrir alla. Á heimasíðu Strætó www.straeto.is og með strætó smáforritinu er hægt að finna á auðveldan hátt leiðir að áfangastað. Strætómiða og -kort er hægt að kaupa á heimasíðu Strætó og í Vídeómarkaðnum, Hamraborg.
