Sérstök Smáralindar útgáfa af NUDE Magazine er gefin út í dag. Í tilkynningu frá Smáralind kemur fram að í blaðinu, sem er 84 blaðsíður að lengd, er fjallað um allt það helsta í haust- og vetrartískunni 2013.
Glæsilegir tískuþættir sýna það nýjasta í dömu-, herra- og barnafatatískunni. Þetta er í fyrsta skiptið sem barnafatnaður er sýndur í NUDE Magazine.
Fyrir utan starfsfólkið hjá NUDE magazine tóku ljósmyndarar eins og Kári Sverrisson, Gulli Már og Íris Dögg Einarsdóttir þátt í verkefninu og eiga hver um sig einn myndaþátt í blaðinu. Í blaðinu er einnig að finna áhugaverð viðtöl og greinar og allt um förðunina fyrir haustið.
Blaðinu verður dreift í Smáralind og geta því allir aðdáendur NUDE Magazine og flottra tískutímarita komið og nælt sér í frítt eintak.
Þetta er í annað sinn sem blaðið er gefið út á prenti í samstarfi við Smáralind og síðast kláraðist upplagið á skömmum tíma.
Blaðið verður einnig hægt að skoða á www.nudemagazine.is eða á www.smaralind.is
