Erlendir ferðamenn hætta ekkert að koma til landsins og plássið sem Reykjavíkurhöfn hefur upp á að bjóða fyrir skemmtiferðarskip er sagt fyrir löngu vera sprungið. Framkvæmdastjórar hafna á suð-vestur horninu hafa rætt um hvernig hægt sé að virkja hafnirnar betur en núna er gert með því að skilgreina betur verkefni hverrar hafnar. Lagt hefur verið til að Kópavogshöfn verði svokölluð „yndishöfn,“ það er að segja að hún verði miðstöð smærri báta, skúta og jafnvel móttaka fyrir smærri skemmtiferðaskip.
Fyrir starfsemi af þessu tagi þarf að vera aðstaða til þvotta, baðaðstaða og verslun, svo fátt eitt sé nefnt. Rannveig Ásgeirsdóttir, formaður bæjarráðs Kópavogs, tekur vel í hugmyndina og segir að rætt hafi verið um að svæðið við Kópavogshöfn verði íbúða- og þjónustusvæði og myndi þá rýma við lágstemmda hugmynd um yndishöfn. „Slík starfsemi myndi án efa hleypa lífi í nesið og hvetja til fjölbreytileika á svæðinu um leið og þessi fallegi staður gengi í endurnýjun lífdaga ef svo má segja. Þá þyrftum við að gera gangskör að því að halda umhverfinu aðlaðandi og hreinu og fyrirtæki sem þar starfa myndu í sama anda leggjast á árar með bæjarfélaginu við það.“
Rannveig segir hugmyndina vera skynsamlega og í anda þess að sveitarfélög starfi saman og finni virðið í því að dreifa verkefnum á milli sín. „Það er líka mikilvægt fyrir ferðamennsku á höfuðborgarsvæðinu öllu að auka við flóruna og geta boðið upp á afþreyingu víðar en á Reykjavíkursvæðinu. Það er af nógu að taka hér í Kópavogi þar sem saga, menning og afþreying er við hvert fótmál. Að auki höfum við allt til alls í verslun og þjónustu og við eigum að vera opin og jákvæð fyrir nýjum sjónarhornum í samgöngum og ferðamálum. Þessi hugmynd er sannarlega nýtt sjónarhorn sem vert er að skoða.“
