Skólahald hefst á ný í Kársnesskóla mánudaginn 22. nóvember 2021, en kennsla féll niður síðastliðinn föstudag vegna fjölda smita auk þess sem skipulagsdagur var í skólanum á fimmtudag. Foreldrar barna í Kársnesskóla fengu tilmæli síðastliðinn fimmtudag um að fara með börn í skimun nú um helgina til þess að gæta fyllsta öryggis. Þetta fjögurra daga hlé á skólahaldi hefur skilað þeim árangri að mati stjórnenda og almannavarna að tekist hefur að hægja á útbreiðslunni, að því er segir í tilkynningu frá Kópavogsbæ.
Á rúmri viku greindust rúmlega fimmtíu smit í Kársnesskóla, og voru þar af fimm kennarar. Allri rakningu er lokið og þeir sem hafa þurft að fara í sóttkví hafa fengið skilaboð um það.
Fimmtudagur og föstudagur voru nýttir til að þrífa, sótthreinsa snertifleti í skólanum og skipuleggja skólastarfið framundan.
Meðal breytinga í næstu viku er að dregið verður einn frekar úr blöndun hópa sem þýðir að skipting nemenda í lotum, list- og verkgreinum verður með breyttu sniði. Á yngsta- og miðstigi verður engin blöndun nemenda, ekki heldur innan árganga. Íþróttakennsla fer fram utan dyra og söngstund fellur niður.
Vegna hólfaskiptinga og veikinda starfsmanna í frístund verður hún lokuð fyrir nemendur í 3. og 4.bekk á mánudag en opin fyrir 1. og 2. bekk.
Á elsta stigi eru mjög margir nemendur bólusettir og ekki hefur greinst nema eitt smit í þeim árgöngum, því verða minni aðgerðir þar en þó verður ekki blöndun nemenda milli árganga i kennslu.
