Það er skapandi að búa í Kópavogi

ritstjorn

05/09/2017

Skapandi sumarstörfum Kópavogsbæjar lauk í lok júlí með veglegri lokahátíð sem fram fór í Molanum Ungmennahúsi að Hábraut 2. Rúmlega 250 gestir mættu á hátíðina, sem var hin glæsilegasta. Listamenn Skapandi sumarstarfa kynntu þar afrakstur vinnu sinnar. Á hátíðinni var gestum meðal annars boðið á frumsýninu á stillimyndinni „Marglita Marglittan,“ frumhlustun á smáskífunni „Eftir á að hyggja“ og samtímaritinu ÓNEFNA. Einnig var í boði hlaðvarpsdiskó inni í Geislahvelfingu, karaókí-herbergi, ljóðalestur og gistipartý.

Eftirsótt af ungmennum

Skapandi sumarstörf hafa verið starfrækt síðastliðin 11 sumur og er þetta því tólfta sumarið sem ungu listafólki gefst tækifæri á að starfa að eigin list og þróa hugmyndir sínar áfram. Skapandi sumarstörf eru mjög eftirsótt af ungmennum Kópavogsbæjar á hverju ári og þetta árið var engin undantekning. Mikið samstarf var á milli listafólks Skapandi sumarstarfa, bæjarins og bæjarbúa yfir sumarið og í sumar hafa Gerðarsafn, Cafe Catalína, Kópavogslaug, Kópavogskirkja, bæjarstjórinn sjálfur snert á eða aðstoðað við verkefnin.

Myndlistarmennirnir Rannveig Jónsdóttir og Sigrún Gyða Sveinsdóttir mynda saman tvíeykið DJ VHS (Vidjó-hljóð-skúlptúr). Þær hafa báðar áralanga tónlistar- og sviðslistamenntun að baki. DJ VHS byggist á samsetningu þeirra miðla sem þær hafa tileinkað sér undanfarin ár í myndlistarnámi sínu. Sigrún hefur lagt áherslu á video myndatöku og Rannveig á skúlptúr, en hljóð hefur verið leiðarstef í verkum beggja.
Instagram: @DJ_VHS

Hákon Jóhanneson, stundum þekktur sem Hákon Lobster, skrifaði áhugaverðar leiksenur með lifandi vinnuaðferðum í virku ferli. Senurnar öðluðust líf á mismunandi vígstöðum í hinu skapandi umhverfi og voru útfærðar þannig að íbúar Kópavogsbæjar nutu góðs af.
Instagram: @hakonlobster
Snapchat: hakon.gas

Birna Særós Sigurbergsdóttir og Hera María Jacobsen sköpuðu ljósmyndaþátt sem kallast Sumrungar. Þátturinn byggðist á hugmyndum og tengingum fólks við hið dæmigerða íslenska sumar. Hugmyndir að myndefni voru fengnar með viðtölum við almenning.
Vefsíða: sumrungar.com