Í tilefni Alþjóðlegs hjartadags var Hjartadagshlaupið haldið í áttunda sinn í Kópavogi sunnudaginn 28. september. Boðið var upp á 5 og 10 km vegalengdir og var þátttaka í hlaupinu ókeypis eins og ætíð. Metfjöldi tók þátt eða ríflega 270 manns. Hlaupið hófst við Kópavogsvöll og lá leiðin út á Kársnes og endaði á hlaupabrautinni á Kópavogsvelli. Stemningin var góð enda lék veðrið við þátttakendur.
Í 5 km hlaupinu voru sigurvegarar Ingvar Hjartarson sem hljóp á 16:55 min og Andrea Kolbeinsdóttir á tímanum 18:37.
Í 10 km hlaupinu sigraði Arndís Ýr Hafþórsdóttir í kvennaflokki á 38:43 min og Geir Ómarsson á 35:43 mínútum.
Strax í kjölfars hlaupsins var gengin Hjartaganga um Kópavogsdal undir leiðsögn Friðris Baldurssonar, garðyrkjustjóra Kópavogs.
Um Alþjóðlegan hjartadag:
Dagurinn er haldinn 29. september ár hvert en það er Alþjóðahjartasambandið (World Heart Federation) sem hvetur aðildarfélög sín um allan heim til að halda upp á Hjartadaginn. Á Íslandi sameinast Hjartavernd, Hjartaheill, Neistinn og Heilaheill um að halda daginn hátíðlegan.Félögin hafa haldið upp á daginn með hjartadagshlaupinu og hjartagöngunni um árabil í samvinnu við Kópavogsbæ sem hefur boðið þátttakendum í sund að hlaupi loknu. Frjálsíþróttadeild Breiðabliks sér um framkvæmd hlaupsins en hlaupaleiðin liggur um Kársnesið.
Þema hjartadagsins í ár eru samfélagið og umhverfi einstaklingsins. Heilbrigður lífsstíll er mikilvægasta forvörn gegn hjarta- og æðasjúkdómum. Einstaklingurinn ræður sjálfur mestu um sinn eigin lífsstíl. Mikilvægt er þó að gera einstaklingnum kleift að haga sínum lífsstíl á sem heilsusamlegastan máta. Umhverfi okkar þar sem við búum, vinnum og iðkum frístundir, getur haft mikil áhrif á getu okkar til að taka réttar ákvarðanir með heilsu okkar í huga. Á síðustu áratugum hefur margt breyst til batnaðar í samfélagi okkar og umhverfi. Okkur hefur verið gert auðveldara að lifa heilsusamlegu lífi, sé áhugi fyrir hendi. Hjólastígar, göngustígar, almenn útivistarsvæði, takmarkanir á reykingum og ýmislegt fleira hafa skilað sér til þjóðarinnar í bættri heilsu. Sérhver hreyfing er mikilvæg fyrir heilsuna. Ekki þarf alltaf mikið til.
