Pétur Hrafn Sigurðsson, bæjarfulltrúi Samfylkingarinnar.
Capacent gerði í lok síðasta árs þjónustukönnun meðal íbúa stærstu sveitarfélaga landsins og spurði hversu ánægðir eða óánægðir íbúar eru með hina ýmsu þjónustuþætti sem að þeim snúa. Það er ánægjulegt að 88% íbúa í Kópavogi eru ánægð með bæjarfélagið sem stað til að búa á og sama prósenta er ánægð með aðstöðu til íþróttaiðkunar í Kópavogi og má örugglega þakka öflugum íþróttafélögum hluta þeirrar niðurstöðu.
Kópavogsbúar eru frekar ánægðir með sitt nánasta umhverfi (79%), þjónusta leikskólanna fær fína einkunn (76% ) en þjónusta grunnskólanna heldur lakari (69%).
Athygli vekur hinsvegar hvað bærinn skorar lágt í þjónustu við fatlaða en aðeins 40% íbúa eru ánægð með þjónustu bæjarins þar. Enn fremur skorar Kópavogur lágt í skipulagsmálum með aðeins 48% íbúa ánægða en 20% verulega óánægða og skora skipulagsmálin lang hæst yfir alla þjónustuþættina í flokki verulega óánægðra íbúa.
Aðeins 55% Kópavogsbúa eru ánægð með þjónustu við aldraða borgara í Kópavogi og 61% íbúa eru ánægð með þjónustu við barnafjölskyldur.
Það er því ljóst samkvæmt þessari könnun að verulegt rými er til úrbóta, sér í lagi í félagslegum málefnum eins og í málaflokki fatlaðra, aldraðra og barnafjölskyldna. Lausnir og úrbætur í þeim málaflokkum kosta fé og ljóst að þar verður að bæta í með nýrri forgangsröðun og að auknar tekjur bæjarfélagsins fari í þessa málaflokka.
Sérstaka athygli vekur mikil óánægja Kópavogsbúa með skipulagsmál almennt í bæjarfélaginu. Þar eru miklir möguleikar til úrbóta, án þess að það þurfi að kosta til miklum fjármunum. Þar ber hæst aukið samráð við íbúa í skipulagsmálum, að íbúar séu hafðir með í ráðum þegar verið er að fjalla um þeirra nánasta umhverfi og hlustað á tillögur þeirra. Íbúar finni að bæjaryfirvöld séu að vinna í skipulagsmálum með hagsmuni íbúanna í huga. Það vinnulag mun skila okkur áfram veginn og hærri einkunn í næstu þjónustukönnun.
Pétur Hrafn Sigurðsson, bæjarfulltrúi Samfylkingarinnar
