Sú hefð hefur fest sig rækilega í sessi hjá görpum á Íslandi að synda 1500m keppnissund að morgni Þorláksmessu. Garpar eru sundmenn eldri en 25 ára og þeim hópi tilheyrir alls konar fólk. Bæði er um að ræða fólk sem æfði sund sem börn og unglingar og kallast meðal garpa „gamlir sundmenn“. Þá er einnig fólk sem byrjaði að æfa sund á fullorðinsaldri og hefur æft til lengri eða skemmri tíma. Allir geta verið með en hámarksfjöldi í sundinu er 79 sundmenn. 7-8 sundmenn synda á hverri braut og eru ræstir með 5 sekúndna millibili.
Þorláksmessusundið hófst í Kópavogslaug árið 1990 og í ár verður þetta haldið í 25. skipti. Margir hafa verið með árum saman en þátttökumet á þó Ragnar Marteinsson sem hefur synt 21 sinni og lætur sig ekki vanta núna.
Nokkur önnur sundfélög utan höfuðborgarsvæðisins hafa tekið þennan sið upp og synda sitt eigið Þorláksmessusund. Það mæta þó oft nokkrir sundmenn frá Akranesi, Selfossi og Sauðárkrók í Kópavoginn til að synda.
Undanfarin tvö ár hefur Kópavogsbúinn Jón Margeir Sverrisson verið fljótastur og klárað sundið á u.þ.b. 18 mínútum. Þeir sem eru rólegastir, synda á rúmum 40 mínútum. Þótt einn besti sundmaður þjóðarinnar sé um helmingi fljótari að klára en sá sem síðastur lýkur sundinu er hann ennþá í heita pottinum til að taka á móti þeim rólegustu. Þannig verður munurinn á hröðustu og hægustu sundmönnunum afstæður – allt snýst þetta um að njóta samverunnar og sundsins. Jón Margeir Sverrisson var íþróttakarl Kópavogs 2012 og ólympíufari. Jón er þó langt undir meðalaldri keppenda sem er um 45 ára í ár. Það er öruggt að sund er ein besta þjálfun sem völ er á fyrir fólk á öllum aldri.
Að lokinni pottasetu og spjalli bjóða Sunddeild Breiðabliks og Þríkó upp á morgunmat og gæða kaffi í kjallara sundlaugarinnar og myndast þar mjög góð stemning.
Keppni hefst kl. 8:20 í Kópavogslaug þann 23.12.15.
Nánari upplýsingar má nálgast á heimasíðu sunddeildar Breiðabliks www.breidablik.is/sund
