Þau gleðilegu tíðindi áttu sér stað í vikunni tillaga meirihluta Bjartrar framtíðar og Sjálfstæðisflokks um kaup á Digranesvegi 1 fyrir stjórnsýslu Kópavogs var samþykkt einum rómi á bæjarstjórnarfundi. Húsnæðismál stjórnsýslunnar hafa verið í brennidepli síðan haustið 2014 þegar ljóst var að ráðast þyrfti í umfangsmiklar endurbætur á Fannborg 2. Við erum afar ánægð með að lyktir þessa máls eru kaup á húsnæði sem ríkir sátt um í bæjarstjórn og vonandi á meðal bæjarbúa. Kostir hússins eru ótalmargir. Aðgengi að húsinu er gott, það stendur á einum fjölfarnasta stað í bænum, vel tengt umferðaræðum og almenningssamgöngum. Menningarhús bæjarins eru skammt undan og verslun og þjónusta innan seilingar. Loks má þess geta að stækkunarmöguleikar gera það að verkum að við getum haft þá framtíðarsýn að stjórnsýslan verði öll í einu húsi. Síðari hluti tillögunnar sem samþykkt var á þriðjudag snýr að því að að innrétta Hressingarhælið við Kópavogstún fyrir fundi bæjarstjórnar og móttökur á vegum bæjarins. Því ber einnig að fagna, menningarverðmæti þess húss er óumdeilt, það verður glæsileg umgjörð fyrir fundi bæjarstjórnar og viðburði.
Leiðin að þessari niðurstöðu hefur verið hlykkjótt eins og kunnugt er. Ekki var sátt um að flytja bæjarskrifstofur í Norðurturn Smáralindar, og bygging nýs ráðhúss var talin of áhættusöm. Endurbætur á Fannborg virtust blasa við, þó að það lægi alltaf fyrir að þær gætu orðið afar kostnaðarsamar. Einkar ánægjulegt er því að full samstaða ríkir um kaup á Digranesvegi 1. Leiðin er fjárhagslega hagkvæm, húsið kostar minna en áætlaðar viðgerðir á Fannborg og við erum þá laus við þá áhættu sem fylgir því að gera upp gömul hús en slíkar viðgerðir fara nær undantekningarlaust fram úr áætlun. Húsið uppfyllir flestar þarfir sem við höfðum í huga þegar við hófum þessa vegferð. Kópavogsbúar hafa eignast nýjar bæjarskrifstofur á afar góðum stað. Til hamingju öll.
