Mekka pönksins á Íslandi eru vafalaust undirgöngin í Kópavogi við Digranesveg. Þar komu pönkarar saman, þegar diskóið var að líða undir lok, og drukku eitthvað allt annað en malt. Oft nötruðu undirgöngin af skerandi öskrum pönkaranna í engum takti við hávært gítarglamur í einhvers konar tónlistargjörningi. Þetta var tryllt, skapandi orka sem reyndist mörgum skaðleg – en út úr henni kom líka pönkhljómsveitin Fræbbblarnir svo fátt eitt megi telja.
Pönkið er löngu dautt en undirgöngin lifa.
Nú ætla ungir og efnilegir tónlistarmenn Kópavogs að hefja undirgöngin aftur til vegs og virðingar með því að blása til tónleikahalds. Næsta fimmtudag, 25. júlí, verða semsagt haldnir trylltir raftónleikar í undirgöngunum við Hamraborg, undir Digranesveg. Tónleikarnir hefjast kl 19:00 og er aðgangur ókeypis.
Tónlistamennirnir sem fram koma eru:
RAFMAGNÚS
MUDD MOBB
KRAKKBOT
DJ FLUGVÉL OG GEIMSKIP
Undirheimarnir nötra á ný. Góða skemmtun.
