Katrín Helga Reynisdóttir
Kópavogur er bærinn minn og ég ber hag hans fyrir brjósti. Hér lifi ég og hrærist ásamt eiginmanni mínum, Sigtryggi, sem er innfæddur af Snælandinu og sonum okkar tveimur. Þrátt fyrir að vera ekki innfædd þá hef ég verið með annan fótinn hér frá unglingsárum og átt sterk tengsl við Kópavog. Við fjölskyldan erum hluti af mannlífi Kópavogsbæjar og tökum þátt í því lífi og starfi sem í bænum fer fram. Montin get ég sagt frá því að fyrsta Bæjarstýra Kópavogs Frú Hulda Jakobsdóttir var náskyld mér.
Skipulagsmál og framtíðarsýn bæjarins eru mér einkar hugleikin. Því fagna ég stórkostlegu einstaklingsframtaki í uppbyggingarstarfsemi sem nú er farin af stað á Nýbýlaveginum og í Hamraborginni þar sem verið er að skipuleggja hótel. Mörg teikn eru á lofti sem benda til þess að það sé uppgangur í hagkerfinu og er þar Kópavogur engin undantekning.
Eins á sér stað mikill uppgangur og þróun í Auðbrekkunni en þar hafa margir listamenn komið sér fyrir hver með sitt hugðarefni. Til að bæta enn um betur væri mikill fengur að frekari tengingu frá Hamraborginni við umlykjandi götur eins og Auðbrekkuna og Nýbýlaveginn. Góður göngustígur gæti hæglega orðið til þess að byggja upp skemmtilegan gönguhring. Ég tel að með því móti væri verið að styrkja og standa við bakið á þeirri starfsemi sem nú þegar er farin af stað á þessum slóðum. Á góðum dögum gætu gestir og gangandi litið inn í vinnustofur listamanna og skoðað þau ólíku hönnunar- og hugvitsverk sem þar eru að finna. Þá gæti Sögufélag Kópavogs tekið að sér skemmtilegar fræðsluferðir um Kópavog. Það er góður grundvöllur fyrir því að gera Kópavog að ferðamannabæ.
Í látunum hér á árum áður voru margir stórhuga og settu af stað fyrirtæki og rekstur en höfðu ekki næga kunnáttu í farteskinu og létu það jafnan sitja á hakanum að afla sér þekkingar og aðstoðar í öllum hraðanum sem oftar en ekki var við völd. Bókhaldsfyrirtækið mitt sigldi líka gegnum ólgusjó eins og margur annar rekstur en ég hóf sjálfstæðan rekstur í bílskúrnum hjá mér í vesturbæ Kópavogs fyrir 10 árum síðan eftir að hafa unnið við bókhald í um 20 ár með hléum. Um tíma var ég svo með starfsemi mína í Hambraborginni. Eftir hrunlægðina fórum við af stað á nýjan leik og erum nú komin í góð húsakynni á Nýbýlavegi 8 þar sem við starfsrækjum Profito bókhaldshús. Þar bjóðum við upp á hina hefðbundnu bókhaldsþjónustu og leggjum allan metnað í að að rekstraraðilinn geti lesið og skilji sinn rekstur frá A-Ö, viti hvað hann á og hvað hann má.
Í gegnum starf okkar höfum við skynjað óvissu hvað varðar marga hluti þegar á að fara að skella sér í að hefja atvinnurekstur. Endalausar spurningar vakna og þykir okkur t.d. vera mikil vöntun á handleiðslu þegar að þessu kemur. Þarna erum við að tala um sérstaklega öll þau eyðublöð sem þarf að fylla út og hvaða skyldur því fylgja. Sem dæmi má nefna RSK 5.02 eyðublaðið sem fjallar um að skrá sig á virðisaukaskattsskrá og launagreiðendaskrá. Þetta blað markar upphaf samskipta við skattyfirvöld en ekki er alltaf á hreinu hvað það þýðir. Við hjá Profito Bókhaldshúsi ákváðum að bretta upp ermar og setja af stað örnámskeið þar sem farið er í upphaf reksturs frá grunni. Við erum með átta manns í einu sem hámarks fjölda á hverju námskeiði. Við leggjum áherslu á persónulega og einstaklingsmiðaða þjónustu. Hægt er að skrá sig á www.profito.is
Okkar helstu viðskiptavinir á þessum námskeiðum hafa verið verktakar, frumkvöðlar og eigendur smærri fyrirtækja. Við teljum mikilvægt að gera rekstraraðilum ljóst að bókhald er vandasamt verk og hraði og spenna á lítið við í þeim efnum. Til hægðarauka fyrir viðskiptavini bjóðum við jafnframt upp á fjarnámskeið því mörgum þykir það án efa hentugt að geta verið á sínum heimavelli og sótt námskeiðið þaðan. Okkur er umhugað um að leiða viðskiptavini okkar í gegnum oft og tíðum torskilið tungumál sem á rætur sínar að rekja í frumskógi skattalaga og reglugerða. Það hefur sýnt sig og sannað að oft hefur ekki meira þurft til en að hitta fólk og fara yfir hlutina með þeim á mannamáli.
Facebook
Instagram
YouTube
RSS