Upppantað á sjávarútvegssýninguna í Fífunni. Verður sú stærsta frá upphafi.

ritstjorn

18/09/2014

Sjávarútvegssýningin, sem hefst á fimmtudag í næstu viku í Fífunni, verður sú allra stærsta í þrjátíu ára sögu hennar. Þegar hafa um 500 fyrirtæki tilkynnt um þátttöku og er löngu uppselt í alla bása. Um helmingur fyrirtækjanna kemur erlendis frá. Undirbúningur er í fullum gangi en yfir 100 manns koma að sýningarstjórn, uppsetningu, öryggisgæslu, ræstingum og fleiru sem þarf til svo að sýningin gangi snuðrulaust fyrir sig.

Fyrirtækið Fagsýningar setur upp sýninguna og þeir Eggert Arason, Guðsteinn Halldórsson og Ómar Már Jónsson máttu varla vera að því að líta upp þegar við kíktum í Fífuna í morgun.

Byrjað er að reisa bása í Fífunni.

Bjarni Þór Jónsson, fulltrúi sýningarstjórnar, segir sjávarútvegssýninguna hafa meira en tvöfaldast að stærð frá því hún hóf göngu sína fyrir þrjátíu árum. „Sýningin hefur löngu sannað gildi sitt og það er mikil fagmennska í kringum hana, bæði hjá skipuleggjendum og hjá þátttakendum á sýningunni. Það hefur mikið vatn runnið til sjávar frá því fyrsta sýningin var haldin árið 1984 en íslensk fyrirtæki hafa alltaf nýtt sér hana til að kynna tækninýjungar og framfarir,“ segir Bjarni.

Bjarni Þór Jónsson, fulltrúi sýningarstjórnar.

Sýningin stendur yfir frá 25. til 27. september.