Lokahátíð Nótunnar, sem er uppskeruhátíð íslenskra tónlistarskóla verður haldin í Eldborgarsal Hörpu sunnudaginn 2. apríl næstkomandi. Þar koma fram fulltrúar tónlistarskóla af öllu landinu sem voru valdir til þátttöku á fernum forvalstónleikum um síðustu helgi. Einir slíkir tónleikar fóru fram í Salnum í Kópavogi. Þar komu fram fulltrúar tónlistarskóla af Reykjanesi, Suðurlandi og Kraganum. Skemmst er frá að segja að atriðin sem þar voru flutt voru hvert öðru glæsilegra og báru góðan vitnisburð um það góða starf sem unnið er í tónlistarskólum landsins. Það var því erfitt starf fyrir dómnefndina að velja þau sjö atriði sem þóttu skara fram úr og fá að koma fram í Hörpu.
Meðal þátttakenda var C sveit Skólahljómsveitar Kópavogs sem fékk viðurkenningu fyrir flutning sinn á laginu Arabesque eftir Samuel Hazo og verður því meðal þátttakenda á lokahátíðinni í Eldborg. Skólahljómsveitin er þó ekki óvön þessu, því í sex skipti af þeim sjö sem hátíðin hefur verið haldin á hljómsveitin fulltrúa meðal þeirra bestu og má segja að það beri vott um það góða starf sem unnið er með nemendum hljómsveitarinnar. Tónlistarskóli Kópavogs á einnig tvö atriði í Eldborg og því ljóst að tónlistarkennsla í Kópavogi er ansi öflug. Þeir sem hafa áhuga á að hlusta á tónlistarfólk framtíðarinnar sýna hvað í því býr ættu endilega að skella sér í Hörpu þann 2. apríl á tónleika klukkan 12 og 14. Það verður enginn svikinn af þeirri skemmtun.
