Landsbankinn á sér langa sögu í Kópavogi en útibúið í Hamraborg fagnar 30 ára afmæli síðar á þessu ári. Útibúið flutti í núverandi húsnæði að Hamraborg 8 árið 2005 en staðsetningin tryggir viðskiptavinum mjög gott aðgengi að útibúinu. „Við erum ánægð með að eiga hér góða og trausta viðskiptavini, bæði einstaklinga og fyrirtæki, sem hafa verið í viðskiptum hjá okkur jafnvel áratugum saman og erum stolt af okkar þátttöku í öflugri uppbyggingu í Kópavogi,“ segir Sigrún Sæmundsdóttir, útibússtjóri Landsbankans í Hamraborg.
Endurbætt ráðgjafarútibú og sveigjanlegri þjónusta
Fjármálaþjónusta og kröfur viðskiptavina hafa breyst mikið á þessum 30 árum. „Sífellt fleiri viðskiptavinir kjósa að nýta sér stafræna þjónustu okkar til að sinna sínum bankaviðskiptum þegar þeim hentar í netbankanum, Landsbankaappinu eða í hraðbönkum. Til þess að koma til móts við breyttar þarfir höfum við nú opnað stórbætt sjálfsafgreiðslurými í útibúinu sem er aðgengilegt viðskiptavinum allan sólarhringinn. Þar má nálgast alla helstu bankaþjónustu í sjálfsafgreiðslutækjum hvenær sem er. Starfsfólkið okkar er til aðstoðar og veitir þjónustu á opnunartíma frá kl. 10 til 16. Einnig höfum við aukið sveigjanleika í þjónustu með því að bjóða viðskiptavinum upp á að panta tíma í ráðgjöf á staðnum til kl. 16 en alveg til kl. 18 alla virka daga í síma og nú nýlega bættum við fjarfundum við, sem margir viðskiptavinir kunna að meta.“
Einfalda viðskiptavinum lífið
„Við erum til staðar fyrir viðskiptavini sem geta valið sjálfir með hvaða hætti þeir nýta sér þjónustuna okkar. Nú orðið nota viðskiptavinir tölvuna eða símann til að stunda bankaviðskipti í um 99% tilfella. Þegar þörf er á aðstoð og ráðgjöf eða sinna þarf flóknari erindum sem ekki er hægt að ljúka á netinu eða í hraðbönkum hafa viðskiptavinir okkar aðgang að persónulegri þjónustu í útibúum. Útibúið okkar í Hamraborg hefur á að skipa einvalaliði ráðgjafa sem leggja sig fram við að veita viðskiptavinum góða þjónustu hvort sem þeir vilja hitta okkur á fjarfundum, fá ráðgjöf í síma eða mæta til okkar hingað í útibúið. Verið velkomin til okkar í Hamraborgina,“ segir Sigrún að lokum.
