Undanfarin átta ár hef ég starfað sem bæjarfulltrúi í bæjarstjórn Kópavogs. Ég hef einnig setið í framkvæmdastjórn bæjarins og á þeim tíma hef ég lagt mikla áherslu á ráðdeild í rekstri samhliða góðri þjónustu við bæjarbúa. Það er mikilvægt að slaka ekki á í þeim efnum á sama tíma og uppbyggingu er haldið áfram þar sem fjölgun íbúa gefur tækifæri til enn hagkvæmari reksturs Kópavogsbæjar.
Sem varaformaður skipulagsráðs hef ég komið að mörgum þéttingarverkefnum m.a. á Kársnesi, í Smáranum, Glaðheimum og miðbæjarsvæðinu. Það er ljóst að skortur á íbúðum á höfuðborgarsvæðinu er eitthvað sem sveitarfélögin þurfa að koma að og leysa. Jafnvel þó Kópavogur sé næstum fullbyggður eru ennþá svæði sem bjóða upp á nýja byggð. Skipulag á Vatnsendahvarfi er langt komið en þar verða lóðir undir sérbýli í bland við fjölbýli. Síðasti áfangi Glaðheimasvæðis fer að verða tilbúinn undir blandaða byggð atvinnu og íbúða og svo eigum við land upp við Elliðavatn og brýnt að koma því verkefni í gang, enda eitt af fallegustu svæðum höfuðborgarsvæðisins. Við þurfum að flýta byggingu leikskóla til að bjóða yngri börnum leikskólavist og stækka grunnskólana á þéttingarsvæðunum. Nýr Kársnesskóli er í byggingu í þessum töluðu orðum og verður fyrsti Svansvottaði skólinn á landinu.
Á síðasta kjörtímabili var ég formaður umhverfis- og samgöngunefndar. Þar lagði ég m.a. áherslu á umferðaröryggi barna, uppbyggingu hjóla- og göngustíga ásamt því að bjóða upp á fleiri möguleika í flokkun á heimilissorpi. Nú loks stefnir í samræmt sorphirðukerfi fyrir höfuðborgarsvæðið að frumkvæði Kópavogsbæjar sem er mikið framfaraskref fyrir alla.
Mig langar til að starfa áfram fyrir bæjarbúa og óska eftir 2. sæti í prófkjöri Sjálfstæðisflokksins í Kópavogi sem fram fer laugardaginn 12. mars
