Vellíðan eldri Kópavogsbúa í fyrirrúmi

Theodóra S. Þorsteinsdóttir, bæjarfulltrúi BF Viðreisnar í Kópavogi.

Árið 2015 var tekin ákvörðun um að Kópavogsbær gerðist heilsueflandi samfélag. Til að raungera þau markmið var lýðheilsustefna unnin í samráði við íbúa og stofnanir sveitarfélagsins. Áherslurnar í henni tengjast Heimsmarkmiðum Sameinuðu þjóðanna um hreyfingu og andlega líðan sem er gríðarlega mikilvæg fyrir okkur öll. Fjölmörg verkefni eru í gangi til að ná þessum markmiðum, þ.m.t. að koma á heilsueflingarstarfi eldri borgara þar sem líkamleg, andleg og félagsleg virkni er höfði í öndvegi. 

Þegar komið er á efri ár er eðlilegt að smám saman dragi úr líkamlegri getu. Það er hins vegar ljóst að regluleg hreyfing hægir á einkennum og áhrifum öldrunar og lengir þann tíma sem fólk getur verið sjálfbjarga í daglegu lífi og það hefur verið miðað við að skapa aðstæður fyrir eldri borgara til að stunda hreyfingu sem hentar hverjum og einum. Sundleikfimi í sundlaugum, jóga, boccia og línudans eru allt dæmi um það. Nú hefur einnig verið tekin í notkun kerfi sem ber heitið DigiRehab. Um er að ræða einstaklingsmiðað æfingakerfi þar sem starfsmaður heimaþjónustu kemur á heimilið í upphafi tólf vikna tímabils og framkvæmir greiningu á líkamlegri getu og færni í daglegu lífi. Út frá því upphafsmati er sett upp sérsniðið æfingakerfi. Tvisvar í viku mætir sami starfsmaðurinn heim til notanda og aðstoðar hann við að framkvæma æfingar sem birtast á spjaldtölvum. Eftir sex vikur er gert endurmat og æfingaplanið uppfært. Hópþjálfun með þjálfara fyrir eldri borgara á starfsstöðvum hjá Breiðabliki, HK og Gerplu er einnig í startholunum. Notaðar verða mismunandi leiðir til þess að þjálfa styrk, liðleika, þol og úthald og sérfræðingar sjá bæði um þjálfun og mælingar á árangri. Með umhyggju sem eitt af gildum bæjarins og skýrri stefnu er lögð áhersla á að byggja upp og viðhalda góðri lýðheilsu meðal eldri borgara og auka þannig lífsgæði og jafnræði meðal borgara í Kópavogi. Ég óska eldri Kópavogsbúum gleðilegrar hreyfingar til að auka mátt þeirra og vellíðan.  

Deildu:

Facebook
Twitter
Pinterest
LinkedIn

Fleiri fréttir

Þúsundir íbúða í nýjum lífsgæðakjarna í Kópavogi

Áform um uppbyggingu hjúkrunarrýma og íbúða á Gunnarshólma Loftmynd af svæðinu Bæjarráð Kópavogs hefur samþykkt að vísa áfram til samþykktar bæjarstjórnar drögum að viljayfirlýsingu við Aflvaka þróunarfélag um uppbyggingu 5.000

Kársnesskóla skipt í tvo skóla

Kársnesskóla verður skipt upp í tvo sjálfstæða skóla á skólaárinu 2024 til 2025 samkvæmt tillögu menntasviðs Kópavogsbæjar sem samþykkt hefur verið í bæjarstjórn Kópavogs. Lagt er til að skólanum verði

Jólatónleikar Samkórs Kópavogs

Samkór Kópavogs syngur inn aðventuna á sínum árlegu jólatónleikum sunnudaginn 3. desember n.k. Tónleikarnir verða í Digraneskirkju og hefjast kl. 17:00. Einsöngvari með kórnum að þessu sinni er tenórsöngvarinn Gunnar