Vetrarstarf Kvennakórs Kópavogs er hafið og er þetta 13. starfsár kórsins. Gróa Hreinsdóttir stjórnandi kórsins frá 2011 til 2014 kvaddi starfið í vor eftir þrjú viðburðarík og skemmtileg ár og er henni innilega þakkað fyrir samstarfið. Nýr stjórnandi kórsins, John Gear, hefur tekið til starfa og eru æfingar hafnar af fullum krafti. Í kórnum eru um 50 söngglaðar konur á öllum aldri.
Kvennakór Kópavogs hefur tekið sér ýmislegt fyrir hendur undanfarin ár og má þar nefna þátttöku í Landsmóti íslenskra kvennakóra, söngferðalög erlendis, heimsóknir til annarra kóra og tekið á móti vinakórum hér heima. Hægt er að fylgjast með starfi kórsins á heimasíðunni www.kveko.is og á Facebook síðu kórsins.
Spennandi dagskrá er framundan og fyrsta verkefni vetrarins er árlegir styrktartónleikar sem hafa yfirskriftina „Hönd í hönd“. Í ár rennur ágóði tónleikanna til Mæðrastyrksnefndar Kópavogs og Líknardeildar LSH í Kópavogi. Tvennir styrktartónleikar verða haldnir þann 9. nóvember og fara þeir að þessu sinni fram í Austurbæ við Snorrabraut og hefjast þeir fyrri klukkan 16:00 og þeir seinni klukkan 20:00. Kórinn hefur fengið til liðs við sig fjölda frábærra listamanna, og má þar nefna Pál Óskar Hjálmtýsson, Drengjakór íslenska lýðveldisins, Ölmu Rut Kristjánsdóttur og einvala lið hljóðfæraleikara. Allir sem koma að framkvæmd tónleikanna gefa vinnu sína. Miða á tónleikana er hægt að nálgast á Midi.is og kosta þeir 3.000 krónur.
Undanfarin ár hefur kórinn tekið að sér söng við ýmis tækifæri. Hægt er að hafa samband á kvennakorkopavogs@gmail.com ef óskað er eftir skemmtilegum jólasöng á aðventunni.
