Aðfaranótt bóndadagsins var brotist inn í Gullsmiðju Óla við Hamraborg 5. Þjófurinn, eða þjófarnir, létu greipar sópa og stálu munum og ollu tjóni sem nemur um átta hundruð þúsund krónum. „Við fengum að vera í friði í Hamraborginni í átta vikur og sex daga,“ segir Óli Jóhann Daníelsson, gullsmiður sem rekur gullsmiðjuna ásamt eiginkonu sinni, Eygló Sif Steindórsdóttur. „Árið 1993 opnuðum við hér á þessum sama stað og vorum til ársins 1999 þegar við stækkuðum við okkur. Við fórum síðan með verslunina í Smáralind og víðar og erum núna loksins komin heim í Hamraborgina eftir 20 ára fjarveru. En þá gerist svona. Aðkoman var alveg hræðileg. Það voru glerbrot út um allt og hurðin ónýt. Það lágu skart-gripir á gólfinu sem þjófurinn tók ekki séns á að taka með sér. Sem betur fer gerðist þetta um nótt en ekki um hábjartan dag og engu starfsfólki ógnað,“ segir Óli. „Þjófurinn tók gullskartgripi og gullhúðuð sýnishorn af trúlofunarhringum sem eru verðlaus fyrir hann en er mikið tjón fyrir okkur að missa.“
Er búið að finna þjófinn og þýfið?
„Það er búið að finna hluta af þýfinu. Grunur beinist að manni af erlendum uppruna þar sem þýfið fannst heima hjá honum. Ég er 99% viss að þessi maður var búinn að koma inn í búðina áður vegna þess að hann kom hér inni um dimma nótt og gekk fram hjá tveimur skápum sem geymdu skartgripi en fór frekar beint í skáp með gulli. Hann vissi þá hvert hann var að fara. Þessi náungi sem lögreglan hefur grunaðan kom í verslunina tveimur dögum áður.“
Hefur eitthvað breyst í Hamraborginni frá því þið voruð þar áður með verslun?
„Þegar við vorum hér áður var Smáralindin ekki komin og uppbyggingin yfir gjána ekki hafin. Það er margt jákvætt að gerast hér. Hótel er að rísa og í fyrsta skipti förum við að sjá erlenda ferðamenn sem mun auka fjölbreytni. En varðandi glæpina þá eru þeir ekki fleiri nú en þeir voru áður. Það var fjórum sinnum brotist inn til okkar áður. Það sem þarf klárlega að gerast er að koma upp eftirlitsmyndavélum í Hamraborginni til að fæla þjófa frá. Ég hef rætt þetta við lögreeggluna sem tekur í sama streng. Fælingamáttur myndavélanna hefur virkað í miðborg Reykjavikur og það sama á að gilda hér. Þær skapa öryggi sem við eigum rétt á.“
