Björt framtíð í Kópavogi er hópur fólks sem býður sig fram til þjónustu fyrir bæjarbúa og vill gera bæinn okkar betri. Framtíðarsýn okkar er að allir einstaklingar fái notið sín í því samfélagi sem bærinn er.
Við viljum byggja upp öfluga og markvissa þjónustu sem mætir þörfum íbúa Kópavogs. Við leggjum áherslu á mannréttindi og virðingu fyrir fjölbreytileika og að ungir sem aldnir eigi jafnan möguleika á samfélagsþátttöku. Fjölbreytt mannlíf er fagurt mannlíf. Það er markmið okkar að Kópavogur sé leiðandi í velferðarþjónustu á Íslandi og viljum við eiga samtal og samráð við notendur þjónustunnar til að ná því markmiði.
Gott aðgengi að upplýsingum er lykillinn að því að fatlað fólk geti verið virkir þátttakendur í samfélaginu. Í starfi mínu sem sjúkraþjálfari hjá Hjálpartækjamiðstöð SÍ og nú sem forstöðumaður hjá Þekkingarmiðstöð Sjálfsbjargar hef ég kynnst því að fólk hefur oft ekki upplýsingar um þá þjónustu sem það á rétt á og nýtur hennar því ekki. Það er nauðsynlegt að hægt sé að nálgast áreiðanlegar upplýsingar um lögbundna þjónustu sveitarfélagsins á einfaldan og fjótlegan hátt. Einnig leggjum við ríka áherslu á bætt aðgengi fólks að mannvirkjum Kópavogs. Við viljum beita okkur fyrir því að NPA (notendastýrð persónuleg aðstoð) verði raunhæfur valkostur og fyrir uppbyggingu á fjölbreyttu búsetuúrræði og sveigjanlegri ferliþjónustu.
Frambjóðendur Bjartrar framtíðar leggja áherslu á samfélagsþátttöku allra í menningarlífi, tómstundum, námi, dagþjónustu, útivist og öðrum sem hugur viðkomandi stendur til. Við verðum að tryggja að mannréttindi séu virt og farið sé eftir þeim tilskipunum sem koma fram í alþjóðlegum samningum. Sveitarfélag eins og Kópavogur hefur mikil tækifæri til að sækja fram á þessu sviði og það viljum við í Bjartri framtíð gera.
Við viljum efla þjónustu og stuðning við barnafjölskyldur. Það þarf að tryggja að börn með sérstakar þarfir fái þá aðstoð sem þau eiga rétt á í leikskólum, grunnskólum og tómstundastarfi.
Ég vil búa í samfélagi sem að styður fólk til sjáfstæðs lífs, veitir stuðning þegar þörf er á og er aðgengilegt öllum. Þess vegna vel ég Bjarta framtíð.
