Rekstrarafgangur samstæðu Kópavogsbæjar er mun meiri en áætlanir gerðu ráð fyrir, að því er fram kemur í tilkynningu frá bænum. Hagnaður fyrstu sex mánuði ársins eru 452 milljónir króna en gert er ráð fyrir 667 milljónum króna fyrir allt árið í fjárhagsáætlun Kópavogsbæjar. Þetta kemur fram í árshlutareikningi Kópavogs fyrir 1. janúar 2014 til 30. júní 2014 sem var lagður fram í bæjarráði í dag, 11. september.
Betri afkoma bæjarins það sem af er ári skýrist einkum af heldur meiri tekjum en áætlanir gerðu ráð fyrir og lægri fjármagnsgjöldum vegna lægri verðbólgu en áætluð var á tímabilinu. Ármann Kr. Ólafsson, bæjarstjori segir að áfram þurfi að gæta aðhalds í rekstri:
Árshlutauppgjörið skilar okkur betri afkomu en við reiknuðum með sem er gott en þess má geta að nýir kjarasamningar hafa litil áhrif á fyrri hluta ársins og þá var verðbólga lægri en við gerðum ráð fyrir. Við þurfum því og munum áfram gæta aðhalds í rekstri. Það er ánægjulegt að rekstur bæjarfélagsins heldur áfram að styrkjast, skuldirnar hafa lækkað og við höldum ótrauð áfram á þeirri braut að greiða þær niður.“
Rekstrarniðurstaða samstæðu fyrir fjármagnsliði, afskriftir og lífeyrisskuldbindingar var jákvæð um 2.325 m.kr. Þetta þýðir að framlegðarhlutfall samstæðu var um 21%, en í reglum frá eftirlitsnefnd um fjármál sveitarfélaga er gert ráð fyrir að framlegðarhlutfallið sé á bilinu 15-20%.
Skuldahlutfall samstæðu Kópavogsbæjar lækkar á tímabilinu. Það er 179% fyrir samstæðuna 30.júní 2014 séu þær forsendur gefnar að helmingur tekna ársins sé fallinn til og að frádráttur vegna lífeyrisskuldbindinga sé sá sami og í ársreikningi 2013, en skuldahlutfallið var þá 185%. Miðað við sömu forsendur, þá er skuldahlutfall A-hluta komið í 147%.
