Flýta á innleiðingu forvarnarverkefnis í Kópavogi
Tala opinskátt um ofbeldi í öllum grunnskólum, frístund og félagsmiðstöðvum barna
Menntaráð Kópavogs fjallaði um viðbrögð og forvarnir vegna ofbeldis og vopnaburðar barna og ungmenna á fundi sínum í síðustu viku eftir beiðni Sigurbjargar Erlu Egilsdóttur, bæjarfulltrúa Pírata, um dagskrármál þess efnis.
Í ljósi nýlegra frétta af alvarlegu ofbeldi og vopnaburði í samfélaginu hafa ungmenni stigið fram og sagt að þau upplifi sig óörugg og kalla eftir viðbrögðum.
Menntaráð Kópavogs samþykkti á fundi sínum að flýta innleiðingu forvarnaverkefnisins Opinskátt um ofbeldi, sem samkvæmt áætlun stóð til hefja á næsta skólaári. Þverpólitísk samstaða var um tillögu Pírata um að hefja innleiðinguna þess í stað eins fljótt og unnt er á þessu skólaári.
Verkefnið, sem hefur gefið góða raun í Reykjavíkurborg, snýst um að gera starfsfólk betur í stakk búið til að tala um og bregðast við ofbeldi ásamt því að efla börn í að fjalla um ofbeldi og taka afstöðu gegn því. Innleiðingin felur meðal annars í sér fræðslu til kennara og annars starfsfólks skóla- og frístunda og skýra verkferla sem snúa að tilkynningum til barnaverndar ásamt því að tryggja að börn viti af þeirri hjálp sem völ er á.
„Ofbeldi og vopnaburður meðal barna og ungmenna er samfélagslegt vandamál sem við verðum að taka alvarlega. Það er óásættanlegt að börn og ungmenni upplifi sig óörugg í frítíma sínum og daglegum athöfnum. Skólar, frístundastarf og félagsmiðstöðvar í Kópavogi munu leggja sitt af mörkum með því að ræða ofbeldi á opinskáan hátt og taka afdráttarlausa afstöðu gegn því,“ segir Sigurbjörg Erla.
