Mikið var um dýrðir í Kópavogi á aðventuhátíð Kópavogs í dag. Tendrað var á vinabæjartréi frá vinabæ Kópavogs, Norrköping, og slegið upp jólaballi. Nokkrir hressir jólasveinar komu ofan úr fjöllum og mættu á ballið, ungum og öldnum til mikillar gleði. Veðrið lék við Kópavogsbúa sem fögnuðu upphafi aðventunnar í sannkölluðu jólaveðri.
Aðventuhátíðin fór fram á túninu við menningarhúsin í Kópavogi. Ýmsar krásir voru til sölu í jólahúsum úti við. Þá var markaðurinn Handverk og hönnun í Gerðarsafni. Í safninu var einnig fyrsti formlegi opnunardagur Garðskálans, nýja kaffihússins í Gerðarsafni.
Þess má geta að opið verður í menningarhúsum Kópavogs á morgun sunnudag, jólaorigami í Bókasafni Kópavogs og jólakortagerð í Gerðarsafni. Jólahúsin verða opin og kaffihúsið Garðskálinn sömuleiðis.
