Tveir ungir Kópavogsbúar voru nýverið kjörnir fyrir hönd Molans, ungmennahúss Kópavogs, í Ungmennaráð ungmennahúsa Samfés. Hlutverk ráðsins er fjölbreytt og má til dæmis nefna að fulltrúar ráðsins fá tækifæri til þess að koma fram og sitja á ráðstefnum og fundum um málefni tengd ungmennum og æskulýðsmálum hér á landi og erlendis. Þar að auki er tilgangur ráðsins að passa upp á að rödd ungmenna heyrist í samfélaginu.
Molinn ungmennahús er fyrir ungmenni á aldrinum 16-25 ára. Um er að ræða opið frístundastarf þar sem ungu fólki gefst kostur á að koma saman í heilbrigðu umhverfi, sinna áhugamálum sínum og takast á við uppbyggjandi verkefni. Starfsemin hefur verið með óhefðbundnu sniði undanfarið vegna heimsfaraldursins en kappkostað hefur verið við að þjónusta ungmenni eftir bestu getu. Molinn hefur mikið upp á að bjóða þar sem allir geta fundið eitthvað við sitt hæfi.
