Rafnar ehf á Kársnesi afhenti um síðustu mánaðarmót Hjálparsveit skáta í Kópavogi nýjan 11 metra leitar- og björgunarbát en um algjör tímamót er að ræða, enda er þetta fyrsti sérsmíðaði björgunarbáturinn á Íslandi frá upphafi. Báturinn, sem hlotið hefur nafnið Stefnir, byggir á byltingarkenndri hönnun og hefur mikla þýðingu fyrir björgunar- og leitarstarf við landið. „Stefnir boðar tímamót í björgunarstarfi, enda er þetta í fyrsta sinn sem björgunaraðilar á Íslandi fá björgunar- og leitarbát sem er sérsmíðaður á Íslandi. Þeir bátar sem hingað til hafa verið verið til staðar, hafa komið notaðir til landsins, helst frá Bretlandi. Sá yngsti er nú 17 ára og sá elsti 37 ára og munar um minna að fá nú sérhæfðan og splunkunýjan bát,“ segir Kristján Maack, formaður Hjálparsveitar skáta í Kópavogi. Björn Jónsson, framkvæmdastjóri Rafnar ehf segir bátinn vera fyrsta leitar- og björgunarbát í Leiftur seríu fyrirtækisins en hann hefur verið hannaður og prófaður í samvinnu við Hjálparsveitina. „Hann nær 40 hnútum og hefur sæti fyrir 6 og hægt er að koma fyrir tveimur sjúkrabörum. Þetta er vonandi bara fyrsta skrefið í að efla til muna öryggi við strendur landsins með endurnýjun björgunarbátaflotans,“ segir Björn.
Rafnar ehf afhendi Landhelgisgæslunni fyrir skömmu nýjan strandgæslubát, en hann gerir Landhelgisgæslunni kleift að bregðast við aðstoðarbeiðnum á grunnslóð með skjótari hætti.
