Í aðdraganda kosninga er gjarnan reynt að fá fram um hvað kosningarnar snúast, líkt og það sé lögmál að eitthvað eitt mál eigi að verða fyrirferðarmeira en önnur. Í þessari umræðu kemur oft fram hve keimlík stefnumál flokkanna eru, hvort sem okkur stjórnmálamönnunum líkar betur eða verr. Auðvitað eru allir flokkar á móti ofbeldi, með umhverfisvernd (í orði) og ætla að leysa húsnæðisvandann. Svo mætti lengi telja. Það er því kannski einna helst á verkum og vinnubrögðum sem hægt er að skilja á milli flokka og hvað þeir standa fyrir.
Viðreisn er ekki gamall flokkur en hann er þó í þeirri stöðu að geta látið dæma sig af verkum sínum, ólíkt flestum nýjum flokkum sem nú eru í framboði. Á síðastliðnum átta mánuðum hefur Viðreisn tekist að leiða fjölmörg góð mál til lykta og þannig sýnt í verki fyrir hvað flokkurinn stendur. Jafnlaunavottunin sem lögfest var á síðasta þingi hefur hlotið heimsathygli. Fjárveitingar til móttöku flóttamanna voru þrefaldaðar, enda einn af mikilvægustu liðunum í stefnu Viðreisnar að Ísland axli sína ábyrgð á flóttamannavanda heimsins. Reikningar Stjórnarráðsins voru voru opnaðir til að auka gagnsæi í stjórnsýslunni. Í landbúnaðarmálum hefur Viðreisn heldur ekki látið sitt eftir liggja og staðið vörð um hagsmuni bænda, neytenda og skattgreiðenda og lagt til langtímalausnir fyrir sauðfjárbændur og afnám undanþágna frá almennum samkeppnislögum í mjólkuriðnaði
Hér eru einungis fáein dæmi nefnd af verkum Viðreisnar síðustu mánuði og svo mikið er víst að þau verða mun fleiri á komandi kjörtímabili. Til að lífskjör allra á Íslandi standist samanburð við þær þjóðir sem við viljum bera okkar saman við þarf fólk á þing sem hefur þekkingu, þor og reynslu til að breyta. Það gerist hinsvegar ekki sjálfkrafa. Viðreisn er frjálst, öfgalaust og jafnréttissinnað stjórnmálaafl, skipað fólki sem þorir að taka slaginn í þágu almannahagsmuna.
