Undirbúningstímabil meistaraflokks karla í knattspyrnu hjá HK hefst á morgun, föstudaginn 1. nóvember, þar sem liðið býr sig undir slaginn í 1. deildina að ári. Það verða þeir Tryggvi Guðmundsson, leikmaður meistaraflokks, og Bryngeir Torfason, þjálfari 2. flokks, sem stjórna fyrstu æfingunni sem fer fram í Kórnum annað kvöld.
Ekki er búið að ganga frá ráðningu þjálfara í stað Gunnlaugs Jónssonar en Þórir Bergsson formaður meistaraflokksráðs karla sagði við HK-vefinn að unnið væri að því að koma þeim málum á hreint.
„Málin eru í góðum farvegi og þau skýrast vonandi á allra næstu dögum. Aðalatriðið í dag er að okkar leikmenn hefji æfingarnar af krafti frá og með morgundeginum og byrji að búa sig undir skemmtilegt og spennandi tímabil sem við eigum fyrir höndum í 1. deildinni. Það er mikill hugur í öllum sem að þessu koma að gera hlutina vel,“ sagði Þórir Bergsson í samtali við hk.is.
