Ormadagar, barnamenningarhátíð Kópavogsbæjar, hófust í dag og lýkur með glæsilegri hátíð í menningarhúsum bæjarins og í Kópavogskirkju helgina 30. og 31. maí. Yfir 2.000 leik- og grunnskólabörn í Kópavogi hafa boðað komu sína í menningarhús bæjarins í vikunni til að taka þátt í Ormadögum, en þeir hefjast á skipulögðum heimsóknum skólabarna. Þema hátíðarinnar í ár er: Gamalt og nýtt og er áhersla lögð á gamla útileiki og gömul leikföng. Allir eru velkomnir og ókeypis er inn á alla viðburði.
Uppskeruhátíð Ormadaga er á laugardag en þá verður hægt að fara í blöðrubolta, risakeilu og aðra leiki á leik- og útivistarsvæðinu við menningarhúsin. Þar verður einnig flugdrekanámskeið á vegum Bókasafns Kópavogs. Leikfangasýning með gömlu leikföngum frá Árbæjarsafni verður á annarri og þriðju hæð bókasafnsins.
Náttúrufræðistofa Kópavogs sýnir gestum og gangandi stóra og litla orma og í Salnum verða tónleikar með kór Kársnesskóla, þjóðlagahóp Tónlistarskóla Kópavogs og barnahóp Þjóðdansafélags Reykjavíkur. Í Gerðarsafni verður fjölskyldusmiðja og í Tónlistarsafni Íslands verður þjóðdans og leikir með yngsta hópi Þjóðdansafélags Reykjavíkur. Ormadögum lýkur á sunnudag með barnamenningarmessu í Kópavogskirkju með kór Kársnesskóla og nemendum Tónlistarskóla Kópavogs.
Listrænn stjórnandi hátíðarinna er Pamela De Sensi tónlistarkona. Hátíðin er haldin í samstarfi hennar og menningarhúsa bæjarins með styrk úr lista- og menningarsjóði.
Nánari upplýsingar og dagskrá helgarinnar er að finna á heimasíðu Kópavogsbæjar www.kopavogur.is.
